Drejtuesi i Gjykatës Administrative, drejt konfirmimit

Komisioni i Pavarur i Kualifikimit zhvilloi dje seancën dëgjimore për drejtuesin e Gjykatës Administrative, Eriol Roshi. Hetimi për të është kryer në të tri kriteret e rivlerësimit, atë të pasurisë, aftësive profesionale dhe pastërtisë së figurës. Ndërkohë që hetimi pasuror ishte përqendruar në blerjen e një apartamenti në Tiranë, kursimit të shumës 1,5 milionë lekë dhe blerjes së një automjeti, për aftësitë profesionale dhe pastërtinë e figurës nuk janë konstatuar probleme. KPK tha në seancën dëgjimore se është shqyrtuar edhe një denoncim publik për gjyqtarin, bërë në një emision investigativ. Bazuar në relacionin e lexuar nga relatorja Valbona Sanxhaktari, gjyqtari Eriol Roshi është pronar i një apartamenti me sipërfaqe 110 metra katrorë, të blerë për 7.9 milionë lekë. Si burim krijimi, gjyqtari ka deklaruar marrjen e një kredie bankare prej 6.3 milionë lekësh si dhe rreth 1.5 milionë lekë kursime nga shitja e një apartamenti në bashkëpronësi me prindërit. Sipas Sanxhaktarit, pas hetimit administrativ vlerësohet se gjyqtari kishte burime të mjaftueshme për blerjen e apartamentit në vitin 2015. Sipas hetimit, rezultoi se gjyqtari Roshi zotëronte pjesë takuese 1/ 3 e një apartamenti të blerë nga babai për 49 mijë euro në vitin 2006 dhe të shitur për 55 mijë euro në vitin 2012. Gjithashtu, gjyqtari ka në pronësi edhe një makinë tip "Mercedes Benz", e blerë në vitin 2014 me vlerë 6 mijë euro, për të cilën nuk u ngritën dyshime. Ndërkohë, i vetmi problem i diskutuar nga ONM është mbajtja e një shume prej 1.5 milionë lekësh jashtë sistemit bankar. Sipas Theo Jacobs, kjo nuk është normale, ndërsa pyeti Roshin se ku i kishte mbajtur për 4 vite.