Trump mban adresimin e dytë vjetor, me fokus te muri i kufirit dhe tregtia
Presidenti amerikan, Donald Trump, ka mbajtur të martën fjalimin e tij të dytë vjetor të “State of the Union”, duke iu lutur ligjvënësve të kapërcenin dekadat e ngërçit politik. Me kryetaren e Dhomës, Nancy Pelosi, dhe nënpresidentin Mike Pence, ulur pas tij në sallën e Dhomës Përfaqësuese, Trump foli për gati një orë e gjysmë, me ndërprerje të shpeshta të duartrokitjeve të anëtarëve republikanë. Dhjetëra gra demokrate ishin veshur me ngjyrë të bardhë, ngjyra historikisht e lidhur me lëvizjen e të drejtave të grave. Trump e nisi fjalimin me prezantimin e një axhende dypalëshe. Ai ka përmendur arritjet e administratës së tij në dy vjet, duke theksuar rritjen e ekonomisë, punësimin dhe sistemin e taksave, madje duke përmendur termin “mrekulli ekonomike”. Ai ka shënjestruar hetimin ndaj tij për lidhjet me Rusinë si “hetime qesharake të njëanshme”. Por fokusi i tij më i madh ka qenë “kriza” në kufirin jugor të SHBA, ku ai kërkon të ndërtojë një mur kufitar të kundërshtuar nga ligjvënësit, një mosmarrëveshje që shkaktoi mbylljen e qeverisë amerikane për 35 ditë. Trump ka kërkuar edhe në fjalim, financimin për murin në kufi me Meksikën. “Unë kam për ta ndërtuar atë mur”, theksoi ai. Presidenti ka premtuar vende të reja pune për femrat, duke marrë duartrokitje edhe nga ligjvënëset demokrate që ndodheshin në sallë. Duke folur për prioritetet e tij, Trump kërkoi që Kongresi të miratojë “Aktin Reciprok të Tregtisë”, planet e infrastrukturës dhe investimet në industri. Ai përmendi edhe uljen e kostove të kujdesit shëndetësor dhe çmimit të ilaçeve. Më pas, duke ndërruar temë dhe duke u fokusuar në politikën e Jashtme, ai njoftoi takimin e dytë me Kim Jong Un në fund të muajit në Vietnam. Sa për Lindjen e Mesme, përmendi tërheqjen e trupave nga Siria dhe tha se po negocion për paqen në Afganistan, ku do të reduktohet edhe më shumë numri i trupave amerikanë. Ai ka dënuar edhe antisemitizmin. Presidenti e mbylli fjalimin me një thirrje për bashkëpunim dypalësh. “Mendoj për këtë Kongres, për këtë dhomë, ku ligjvënësit para jush kanë votuar për t’i dhënë fund skllavërisë, për të ndërtuar hekurudha dhe au- tostrada, për të mundur fashizmin, për të siguruar të drejta civile, për të përballur një perandori të ligë”, tha Trump. Ai shtoi se “Fitoret më të mëdha të vendit janë duke ardhur”. Sipas një sondazhi të CBS, rreth 76 për qind e shikuesve amerikanë që ndoqën fjalimin e Presidentit, e kanë aprovuar atë. Vetëm 24 për qind nuk e kanë aprovuar.