Presidenti i KiE: Në ferr ka një vend të veçantë për politikanët britanikë, që e nxorën vendin nga BE pa marrëveshje

Bashkimi Europian e ka të vendosur se nuk do të bëjë asnjë rinegocim të marrëveshjes së Brexit me Britaninë e Madhe dhe drejtuesit e unionit kanë kritikuar ashpër palët politike në Mbretërinë e Bashkuar, që nuk kanë arritur të bien dakord për një marrëveshje që ishte e mirë dhe po e nxjerrin vendin nga unioni pa asnjë pakt, zgjedhja më e keqe që mund të bënin. Presidenti i Këshillit Evropian, Donald Tusk, ka shkuar deri në pikën që ka përmendur ferrin për ata që kanë detyruar largimin e vendit nga blloku pa një marrëveshje. Sipas deklaratës së tij, në ferr ekziston një vend i veçantë për politikanët që e kanë mbështetur daljen e Britanisë së Madhe nga Bashkimi Europian pa një plan të përgatitur paraprakisht. Ai e ka përsëritur qëndrimin e BE- së se marrëveshja e nënshkruar me Kryeministren May nuk do të rinegocio- het. Duke folur para gazetarëve pas takimit me Kryeministrin irlandez, Leo Varadkar, Tusk i ka sulmuar edhe Kryeministren britanike dhe liderin e opozitës, duke thënë se ekziston një zbrazëti e lidershipit në zemër të lëvizjes “Qëndro”, për mbetje të Britanisë së Madhe në BE. Tusk, i cili nuk e ka fshehur asnjëherë shpresën e tij që Britania e Madhe ta ndryshojë qëndrimin, tha se e di që në këtë shtet ende është një numër i madh i njerëzve që dëshirojnë ta kthejnë prapa vendimin për tërheqje të vendit të tyre nga blloku. “Këtu nuk ka hapësirë për spekulime. BE është në rend të parë dhe para së gjithash një projekt i paqes. Ne nuk do të luajmë me paqen”, tha ai, duke e kundërshtuar kërkesën britanike për përcaktimin e një kufiri kohor për vendosjen e kontrollit kufitar me Irlandën.