Gjyq e prova në Kuvend për arrestin e deputetëve, Xhafaj ndryshe nga PS: Jemi kthyer në kartona
MAXHORANCA NDRYSHON RREGULLOREN E KUVENDIT PA KONSENSUSIN E OPOZITES. I KERKOHEN PROVA PROKURORISE
Gjatë shqyrtimit të Rregullores së Kuvendit, Fatmir Xhafaj hodhi disa kritika për mënyrën sesi ushtrohet detyra e deputetit në Kuvendin e Shqipërisë. Duke marrë fjalën për të sheshuar tensionet që ishin krijuar në komision ndërmjet maxhorancës dhe opozitës, Xhafaj theksoi se përtej ndryshimeve që janë paraqitur për t’u miratuar, duhet të shtohen disa pika të tjera që lidhen me rolin e deputetit në procesin ligjbërës dhe në procesin monitorues e kontrollues ndaj institucioneve të ekzekutivit. Duke analizuar ndryshimet e bëra në Rregulloren e Kuvendit nga viti 2005 deri në vitin 2017, Xhafaj tha se ato e kanë rënduar pozitën e deputetit, duke theksuar se ligjvënësit janë shndërruar në kartonë për të votuar dhe jo në persona vendimmarrës në ligjvënie. Ai shkoi më tej, duke theksuar se ndryshimet e herëpashershme të Rregullores e kanë shndërruar Parlamentin në një zgjatim të Kryeministrit.
FATMIR XHAFAJ
“Kam bindjen se ndryshimi i Rregullores së Kuvendit është një moment i rëndësishëm në jetën parlamentare, pavarësisht çdo objeksioni. Ashtu sikurse mendoj që nuk është një gjë shumë e mirë fakti që kemi një ndërhyrje të herëpashershme në Rregulloren e Kuvendit. Nuk është pozitive që që nga viti 2005 deri në vitin 2017, Rregullorja e Kuvendit është ndryshuar tetë herë. Që në një kuptim, nuk flet për një lloj qëndrueshmërie, por ajo që është më e rëndësishme për një lloj përgjegjshmëri në këtë proces. Ashtu sikur është e drejtë të mendoj, nuk është herezi, kur është e nevojshme, është domosdoshmëri, ndryshimi i këtij akti që rregullon funksionimin e brendshëm të Parlamentit. Por e marrë si e tillë edhe për vlerën që ka, duhet të jetë një proces sa më i kujdesshëm. Biem dakord që duhet të jetë një proces konsensual dhe s’ka sesi të jetë ndryshe, përtej disa precedentëve aspak pozitivë.
Propozimet e sjella meritojnë vëmendje dhe besoj se do të meritojnë dhe gjithë kujdesin e duhur nga ky komision për të bërë të mundur që të kemi një projekt që të jetë i qëndrueshëm në kohë. Ajo që më shqetëson është fakti që ne, Rregullorja ekzistuese, por edhe ndryshimet që duam të bëjmë, nuk fokusohemi tek ajo që është shumë e rëndësishme, te roli i deputetit. Është shumë mirë të mendojmë sesi duhet të sillen mirë deputetët, pasi për fat të keq, për mjedisin shqiptar është një model real i turpshëm. Por kryesorja dhe ajo që duhet të preokuponte në këto ndryshime është sesi duhet të veprojnë më mirë në procesin ligjbërës dhe në interes të qytetarëve. Sepse, në fund të fundit, ne jemi për këtë funksion këtu. Pra, ajo që do dëshiroja të shtoja më mirë në këto ndryshme është se cilat do të jenë përmirësimet në rolin që luan deputeti në procesin ligjvënës dhe në marrëdhëniet me zgjedhësit. Ndryshimet e herëpashershme që i janë bërë, gati 8 ndryshime nga 2005 deri në 2017, duhet të jemi të sinqertë, që e kanë zbehur rolin e deputetit.
Deputetët sot janë shndërruar në kartona, sesa në persona me integritet për fjalën, për përfaqësimin e zgjedhësve të tyre dhe në ndikimin që kanë në procesin ligjvënës të Parlamentit. Dhe kjo është gjëja që duhet të na shqetësojë më shumë. Që duhet të na preokupojë më shumë. Të gjitha ndryshimet që janë bërë e kanë zbehur së tepërmi këtë rol. Është momenti për të parë sesi mund t’i rikthejmë disa nga ato ndryshme që koha vërtetoi se ishin të padobishme, të dëmshme, që shndërruan legjislativin në një zgjatim të ekzekutivit”.
Deputetët sot janë shndërruar më shumë në kartonë, sesa në persona me integritet për fjalën, për përfaqësimin e zgjedhësve të tyre dhe në ndikimin që kanë në procesin ligjvënës të Parlamentit. Dhe kjo është gjëja që duhet të na shqetësojë më shumë. Që duhet të na preokupojë më shumë