Protestë në Fier, banorët bllokojnë rrugën, kërkojnë largimin e Kryeministrit
Qytetarët e Fierit, të mbështetur nga drejtues të Partisë Demokratike, kanë protestuar dhe kanë kërkuar largimin e qeverisë. Protestuesit kanë bërë thirrje kundër qeverisë, si shkaktare të varfërisë, rritjes së çmimeve, falimentimit të biznesit dhe veçanërisht largimit të të rinjve nga Shqipëria. Ashtu si në qytete të tjera, edhe protestuesit e Fierit kanë bllokuar rrethrrotullimin në hyrje të qytetit, duke paralizuar lëvizjen drejt jugut të vendit dhe anasjelltas. Protestat në qytetin e Fierit vijnë pas një sërë protestash të zhvilluara në disa qytete të vendit, ku në çdo tubim kërkohet largimi i qeverisë dhe Kryeministrit Rama. Një javë më parë protestat nisën në qytetin e Matit për të vijuar me Elbasanin, Kurbinin, Bulqizën. Edhe në ditët e ardhshme degët lokale të Partisë Demokratike kanë njoftuar se do të zhvillojnë protesta dhe do të mbështesin qytetarët në kërkesat e tyre për qeverinë. Kreu i PD- së, Lulzim Basha, gjatë turit të tij të takimeve në të gjithë vendin ka kërkuar që Rama të pranojë ofertën për ta çuar vendin në zgjedhje të parakohshme. Sipas Bashës, PD ka gati planin ekonomik, i cili do të ndikojë drejtpërdrejtë në përmirësimin e jetës së shqiptarëve. Partia Demokratike ka premtuar se që në ditën e parë të marrjes së pushtetit, do të ulë çmimin e naftës me 300 lekë për litër. Gjithashtu, Basha ka theksuar se PD do të ulë çmimin e energjisë për veprimtarinë prodhuese 30- 40%, ndërsa për biznesin e vogël jo më pak se 20%. Në 16 shkurt opozita ka thirrur një protestë popullore për largimin e qeverisë.