Basha: Jemi në kushtet e grushtit të shtetit, s’ka marrëveshjemeRamën
“Më 16 shkurt është gjithçka në dorën tuaj, sillni zemërimin dhe ndershmërinë tuaj para Kryeministrisë”
Kryetari i Partisë Demokratike, Lulzim Basha, ashpërsoi tonet ndaj Kryeministrit Rama duke theksuar se vendi është në kushtet e grushtit të shtetit.
Ditën e djeshme, kryedemokrati Basha zhvilloi një takim me banorët e qytetit të Kukësit, ku i bëri ftesë për të marrë pjesë në protestën e 16 shkurtit. Në fjalën e tij përpara banorëve, Basha vijoi akuzat ndaj qeverisë duke nënvizuar se ajo është e kontrolluar nga grupet kriminale dhe se vendi është në kushtet e grushtit të shtetit nga krimi i organizuar. “T’i japim fund sundimit të Shqipërisë nga pakica dhe ta kthejmë pushtetin dhe ekonominë në duart e shumicës së ndershme të shqiptarëve. Tani, dy mënyra ka për ta bërë këtë. E para, kutia e votimit. Por ju e keni parë se Edi Rama i frikësuar nga gjykimi popullor, për gjithë këto të zeza që u ka bërë shqiptarëve, e ka asgjësuar procesin zgjedhor. E dyta është drejtësia. Po ku është drejtësia? Ku fshihen prokurorët dhe gjyqtarët, kur Gjushi, Gjiknuri e të tjerë socialistë kapen gafil duke vjedhur vota me krimin e organizuar? Prandaj e them dhe e përsëris, se Shqipëria është në kushtet e grushtit të shtetit”, theksoi Basha. Kryetari i PD- së, në vijim të fjalës së tij theksoi se protesta është zgjidhja e vetme për kapërcimin e situatës së krijuar, duke hedhur poshtë çdo mundësi për marrëveshje me kreun e ekzekutivit. “Ne, opozita parlamentare, Partia Demokratike, ka shteruar çdo mundësi. Mundësia e fundit ishte vetingu politik, që ata e refuzuan. Me 16 shkurt është gjithçka në dorën tuaj. Është në dorën tuaj, të derdheni kështu dhe të sillni zemërimin dhe ndershmërinë tuaj para Kryeministrisë. Është në dorën tuaj, të derdheni dhe të vini kështu, për të çliruar të drejtat tuaja të marra peng. Një gjë ju siguroj, marrëveshje me Edi Ramën nuk ka për të pasur më kurrë. Ndaj, ju kërkoj të bëheni pjesë e zgjidhjes. Ju kërkoj ta merrni në dorë zgjidhjen, sepse nuk ka e nuk mund të ketë zgjidhje tjetër, përveç asaj që do të diktojë populli i bashkuar”, deklaroi kryetari i PDsë.
AKUZAT
Kreu i PD- së, në fjalën e tij përpara banorëve të Kukësit nuk kurseu akuzat ndaj qeverisë, duke theksuar se është në pushtet me votat e vjedhura. Duke iu referuar përgjimeve të publikuara në “Zërin e Amerikës”, Basha tha se vetëm në pak minuta u faktua vjedhja e mandateve në katër qarqe. “Ne jemi sot duke u sunduar nga një bandë, e cila e ka marrë pushtetin nga një grusht shteti. Ndryshe nga vendet e tjera, ku grushtin e shtetit e bëjnë ushtarakët apo bandat ideologjike, këtu grushtin e shtetit e kanë bërë bandat e krimit dhe të oligarkëve. ‘ Zëri i Amerikës’ publikoi fakte tronditëse që tregojnë se si vetëm nga disa minuta përgjim, del vjedhja dhe manipulimi i votave. Vjedhja e mandateve në 4 qarqe të Shqipërisë. Edi Rama dhe krimi i organizuar vodhën pushtetin. Ky Kryeministër nuk është Kryeministër. Këta janë kukullat e krimit të organizuar, të oligarkisë që ka uzurpuar pushtetin”, deklaroi kryetari i PD- së.
Kryetari i Partisë Demokratike premtoi nga Kukësi se në qeverisjen e Partisë Demokratike do të hiqet taksa e Rrugës së Kombit. “Le ta nisim me largimin e menjëhershëm të kësaj mase korruptive, që do të jetë masa e ditës sonë të parë të qeverisë së ardhshme, heqja e taksës së Rrugës së Kombit. Heqja e kësaj takse do të jetë jo vetëm drejtësi për kuksianët, që jo vetëm arritën ta reduktojnë atë përmes qëndresës që u dha kurajë të gjithë shqiptarëve, por do të jetë po kështu drejtësi për të gjithë shqiptarët këtej dhe andej kufirit”, tha Basha. Krahas kësaj, kreu i PD- së u premtoi banorëve të Kukësit rihapjen e universitetit të Kukësit për ta kthyer atë në qendrën e studimeve për zonën e Veriut të Shqipërisë.