Komisioneri Publik kërkon shkarkimin e anëtarit të KLP- së

Komisioneri Publik ankimoi dje vendimin e konfirmimit në detyrë të prokurorit, aktualisht anëtar i Këshillit të Lartë të Prokurorisë, Besnik Cani, ndërsa kërkoi shkarkimin e tij. "Komisioneri Publik, pasi shqyrtoi vendimin e Komisionit të Pavarur të Kualifikimit, si dhe mori në konsideratë rekomandimin e paraqitur nga Operacioni Ndërkombëtar i Monitorimit për të paraqitur ankim, vlerëson se, bazuar në provat dhe faktet e administruara nga Komisioni i Pavarur i Kualifikimit, subjekti i rivlerësimit, z. Besnik Cani, nuk plotëson kushtet për konfirmimin në detyrë. Nëpërmjet këtij ankimi, Komisioneri Publik kërkon nga Kolegji i Posaçëm i Apelimit të marrë në shqyrtim çështjen në seancë publike dhe, në përfundim të gjykimit, të ndryshojë vendimin nr. 84, datë 27.11.2018, të Komisionit të Pavarur të Kualifikimit, duke vendosur shkarkimin nga detyra të subjektit të rivlerësimit, z. Besnik Cani", shkru- het në njoftim. Ndërkohë, në ankimin e bërë publik analizon vendimin e KPK- së, duke e konsideruar si të marrë në interpretim të gabuar të ligjit. Në ankim, Komisioneri është shprehur edhe për kontratën e qiradhënies së prokurorit me një shoqëri private. Për KP, kjo kontratë shkel ligjin. "Referuar dhe përmbajtjes së rekomandimit të paraqitur në rastin konkret nga përfaqësuesit e ONM- së, Komisioneri Publik ndan të njëjtin qëndrim, se magjistratët, përveç respektimit dhe zbatimit të ligjit si çdo qytetar tjetër, pritet të sillen me integritet, mirësjellje, duke përmbushur standardet më të larta etike, si gjatë ushtrimit të detyrës, ashtu dhe në jetën private. Ruajtja e integritetit të figurës së magjistratit lidhet pazgjidhshmërisht më ruajtjen në çdo rrethanë të ndershmërisë dhe dinjitetit në jetën private dhe atë publike", argumenton KP. Një tjetër çështje për të cilën Komisioneri mendon se është një thyerje e etikës, është edhe përfitimi i statusit si e pastrehë, për bashkëshorten e prokurorit në kohën kur ai ka qenë prokuror në Fier.