FORMULA E RE Pensionet, përfituesit nga ndryshimi i ligjit
Qeveria bën gati ndryshimet e fundit në ligjin e pensioneve. Kategoritë që preken nga pagesa e re e sigurimeve dhe kush përfiton nga skema e re
Të vetëpunësuave në fshat do t'iu llogaritet pensioni mbi bazën e kontributeve që do të derdhin. Qeveria parashikon të ndërpresë subvencionimin, duke bërë që pensionistët në zonat rurale të marrin aq sa edhe paguajnë.
Aktualisht, masa e kontributit për të vetëpunësuarit është rreth 66 mijë lekë në vit. Por ndërsa në qytet paguhet e plotë, për fermerët detyrimi është vetëm 38,400 lekë. Pjesa e mbetur mbulohet nga buxheti i shtetit. Por, sipas draftit të ri të propozuar nga Ministria e Financave, ky subvencionim ishte kthyer në barrë për arkën e shtetit dhe për me tepër nuk është e drejtë për kategorinë tjetër të kontribuuesve. Në këto kushte, opsioni i propozuar është që fermerët të vazhdojnë të paguajnë sa është aktualisht, pra, 38.400 lekë në vit sigurime dhe në bazë të kësaj vlere të llogaritet edhe pensioni. Kjo do të thotë ulje të masës së përfitimit me më shumë se 30 për qind në raport me pensionin minimal në qytet.
REFORMA
Në reformën e 2014 u përcaktua që masa e kontributit të të vetëpunësuarve në bujqësi do të rritej çdo vit, derisa në vitin 2018 të barazohej me kontributin e paguar nga i vetëpunësuari në zonën urbane. Por as kjo nuk u arrit. Në këto kushte, Qeveria ka menduar si zgjidhje miratimin e një page minimale të posaçme, që do të shërbejë si referuese për derdhjen e kontributeve nga fermerët. Mendohet se kjo pagë do të jetë 14 mijë lekë të rinj për këtë kategori, megjithatë nuk ka ende asgjë zyrtare në këtë drejtim. Ndonëse për fermerët do të ketë një pagë minimale të posaçme, mbi bazën e së cilës do të paguajnë kontributet dhe do iu llogaritet më pas pensioni, ata nuk do të jenë të privuar nga e drejta për të përfitu- ar më tepër. "Nëse një bujk dëshiron të përfitojë një pension më të lartë, ka mundësinë e pagesës me një pagë më të lartë', thuhet në relacionin që shoqëron draftin.
KONTRIBUTET
Njëkohësisht, të drejtat e fituara deri më tani ruhen, dmth, të gjitha vitet e siguruara deri në hyrjen në fuqi të këtij propozimi do të llogariten me pagën minimale në shkallë vendi. "Për efekt të përllogaritjes së pensionit, do të njihen si periudha sigurimi të vlerësuar me pagën minimale të gjitha periudhat e sigurimit pas datës 1.10.1993 e deri në datën e hyrjes në fuqi të këtij ligji, kur këto periudha gjenden të mbuluara me kontribute të paguara sipas masës së kontributit të përcaktuar për personat e vetëpunësuar në bujqësi", specifikohet më tej në relacion.