Vendimi për Dajtin, Basha: I dhanë atë që vetë ai kërkoi
Partia Demokratike ka vijuar me akuza të forta në drejtim të qeverisë dhe Kryeministrit Rama, lidhur me vendimin e Gjykatës së Apelit për të dënuar me 25 vite burg, Dritan Dajtin. Kreu i opozitës, Lulzim Basha, deklaroi se vendimi për kryekriminelin, që vrau 4 oficerë Policie në krye të detyrës, është tregues i drejtësisë së kapur nga Edi Rama. "Shikoni se çfarë bëjnë. Kriminelin që vrau 4 policë në krye të detyrës, drejtësia e kapur nga Edi Rama, e bërë njësh me Edi Ramën, me krimin dhe oligarkinë, tani i dhanë atë që kërkoi vetë ai, 25 vite burg. Po bëhen gati të lirojnë një kryekriminel, që vrau 4 oficerë policie në krye të detyrës. Ky është sistemi që ka ndërtuar", deklaroi Basha, gjatë një takimi që zhvilloi me qytetarët në Gjirokastër. Qëndrim të ashpër kundër këtij vendimi mbajti edhe ish- Kryeministri Sali Berisha. Sipas tij, SHBA, vrasjen e një efektivi të Policisë, e dënon me vdekje përmes karriges elektrike, ndërkohë që në Shqipëri vrasja e katër policëve është dënuar me vetëm 6 vjet heqje lirie. "Në SHBA, vrasja e një polici dënohet me karrige elektrike. Në Shqipëri, kur je mik i Edi Ramës për vrasjen e një polici dënohesh vetëm 6 vjet. Dritan Dajti, miku i Edvinit, vrasësi serial që ekzekutoi katër oficerë policie, u dënua vetëm me 25 vite apo 6 vite burg për një oficer. Kjo është drejtësia e Edvin Kristaq Krimit", shkruan Berisha. Opozita e ka dënuar me forcë vendimin e Apelit për ta dënuar me 25 vite heqje lirie Dritan Dajtin, të dënuar për vrasjen e katër efektivëve të Policisë së Shtetit. Sipas Partisë Demokratike, me vendimin e drejtësisë së rilindur të Edi Ramës, tashmë Dritan Dajtit i duhet dikush për t'i garantuar lirinë me kusht, njësoj si Lul Berisha para zgjedhjeve.