Dialogu Kosovë– Serbi në udhëkryq, pritet platforma
Limaj: Duhet të jemi një zë i unifikuar në procesin e bisedimeve
Dialogu mes Kosovës dhe Serbisë, i cili për këtë vit u fol se do të arrinte zgjidhjen finale gjithëpërfshirëse me njohje reciproke nga të dyja vendet, ka mbetur në udhëkryq.
Askush nuk di se kur ky dialog, që duhej të finalizohej në pakt brenda muajit maj, do të vazhdojë në nivel të lartë mes dy vendeve. Përfaqësuesit e ekipit negociator të Kosovës thonë se po punohet në platformën për fazën finale të dialogut Kosovë- Serbi, që po zhvillohet në Bruksel me lehtësimin e Bashkimit Europian. Autoritetet qeverisëse në Kosovë, pa dy partitë më të mëdha opozitare, po hartojnë platformën dhe po miratojnë ligjin për dialogun, ndërkohë që nga Shtetet e Bashkuara dhe Bashkimi Europian u bëhet e qartë se vazhdimi i dialogut ndërlidhet me pezullimin e tarifës doganore, që u është vendosur importeve nga Serbia dhe Bosnjë e Hercegovina. Ishte Serbia ajo që e ka vendosur si kusht për rikthimin në tryezën e bisedimeve heqjen e taksës 100 për qind ndaj produkteve serbe, të vendosur nga qeveria e Ramush Haradinaj si kundërpërgjigje për politikat armiqësore të Serbisë kundër shtetësisë së Kosovës dhe njohjes së saj në organizatat ndërkombëtare. Megjithëse Haradinaj është shprehur pro vazhdimit të bisedimeve, ai nuk ka pranuar thirrjet e asnjë partneri të rëndësishëm për të hequr taksën ndaj Serbisë, duke argumentuar se kjo do të ndodhë vetëm kur Serbia të njohë pavarësinë e Kosovës, një kërkesë që Presidenti Aleksandar Vuçiç i Serbisë, e ka quajtur të pamundur për t’u realizuar. Por ekipi i dialogut në Kosovë po vazhdon punën për platformën e dialogut. Njëri nga kryesuesit e ekipit negociator, Fatmir Limaj, i cili është edhe zëvendëskryeministër i Kosovës tha për Radion Europa e Lirë, se në javën e ardhshme do të përfundojë puna në platformën për bisedime dhe më pas ajo do t’i dërgohet Kuvendit të Kosovës. Ai bëri thirrje për unifikimin e faktorit politik në Kosovë. “Nëse nuk do të mund ta unifikojmë faktorin politik në Kosovë, të paktën duhet të unifikojmë qëndrimet dhe jeni duke punuar fort në draftimin dhe përfundimin e platformës për dialogun dhe shpresoj që ajo platformë të paraqesë ose të reflektojë qëndrimet e përbashkëta të faktorit politik të Kosovës, që do të dërgonte një mesazh dhe Kosova përfundimisht ta ketë një pozicion zyrtar në raport me dialogun me Serbinë”, tha Limaj. Sipas tij, “Qëndrimi i Republikës së Kosovës, ose platforma jonë, konsiston në ruajtjen e sovranitetit dhe integritetit të Republikës së