Kryeministri: Shëngjin- Velipojë, rrugë me standarde europiane
Rruga e re Shëngjin- Velipojë, një aks strategjik i rëndësishëm për zhvillimin e turizmit, është një tjetër vepër e infrastrukturës në Bashkinë e Lezhës, që do të ndërtohet sipas standardeve më të mira. Kryeministri Edi Rama u shpreh sot gjatë një takimi me banorë të Lezhës, në kuadër të ciklit kombëtar "Për bashkinë që duam", se ky aks që lidh Lezhën me Shkodrën do të shtojë edhe mundësitë e punësimit. "Ndërkohë, do të ndërtojmë edhe urën mbi lumin Bunë për t'i dhënë një rritje turizmit nga të dyja anët midis Shqipërisë dhe Malit të Zi", theksoi Rama. "Rruga Shëngjin- Velipojë do të ndërtohet sipas standardeve më të mira. Jemi në përfundim të procedurës për rrugën MilotBalldren, që do të bashkohet me autostradën dhe do ta bëjë këtë aks më të shpejtë dhe të sigurt jo vetëm për qarkullimin e mjeteve, por me impakt edhe në ekonomi", theksoi Kryeministri Rama. Gjithashtu, zhvillim sipas kreut të qeverisë do të marrë dhe Porti i Shëngjinit. Pas investimeve në portet e Sarandës, Durrësit dhe Vlorës, qeveria ka synim që të transformojë edhe Portin e Shëngjinit. "Për Portin e Shëngjinit ne kemi një projekt dhe kemi qëllimin për ta kthyer në port turistik. Pra, të vijnë anije për turizëm dhe natyrisht edhe për lëvizjen e pasagjerëve dhe ky është projekti. Pjesa e peshkimit nuk diskutohet dhe hap pas hapi do të shkojmë në këtë drejtim. Projekti për portin e madh etj., mbetet një nga ëndrrat e të gjithëve, por nuk kemi pasur asnjë situatë dhe investitorë të rëndësishëm", u shpreh Kryeministri Rama.