Bushati, kritika MEPJ: Ka ngatërruar BE me NATO
"Marrëveshja e Ohrit të figurojë si kriter për avancimin në NATO"
Komisioni për Politikën e Jashtme miratoi dje projektligjin, i cili jep autorizimin nga pala Shqiptare për anëtarësimin e Maqedonisë së Veriut në NATO. Votimi i djeshëm në Komisionin e Jashtëm ishte konsensual ndërmjet palëve, por jo pa kritika, të cilat erdhën nga radhët e maxhorancës. Ish- ministri i Jashtëm, Ditmir Bushati, ngriti kritika për dokumentin e paraqitur në Komision nga ish- dikasteri që ai drejtonte deri para pak javësh, ku theksoi në marrëveshje duhej bashkëngjitur një relacion, i cili të parashikonte detyrimin e palës maqedonase për respektimin e Marrëveshjes së Ohrit. "Dëgjova përfaqësuesit e qeverisë, ka një politikë shtetërore Shqipëria në këtë pikë. Nuk flasim as për sasi dhe as për prezencë shqiptarësh, flasim për shqiptarët si një nga dy komunitetet shtetformuese në Shkup. Dhe kjo është pjesë e programit të politikës së jashtme të kësaj qeverie, që e kemi miratuar të gjithë në Kuvend. Është bërë betejë në 2014 për të përfshirë Marrëveshjen e Ohrit si kriter për avancimin e vendit në NATO dhe duhet të figurojë zyrtarisht si dokument i Kuvendit të Shqipërisë", tha ishministri. Po ashtu, Bushati në fjalën e tij shtoi se qeveria mund të ketë bërë ndonjë lapsus në dokumentin që i ishte dërguar Komisionit për të miratuar, pasi është ngatërruar me procedurat që ka procesi i anëtarësimit në BE. "Mund t'ju them se, duke nisur nga konstatimi në relacion ku flitet për Maqedoninë vend kandidat në NATO, pas Samitit të Uashingtonit, besoj se është një lapsus, është ngatërruar mbase me procedurat që ka procesi i anëtarësimit në Bash- kimin Europian. Prandaj, duke përfunduar këtë pjesë që ka lidhje me substancën e kësaj marrëveshjeje që ne kalojmë sot, duke mos i hequr asnjë presje pjesës që bën Departamenti i së Drejtës Ndërkombëtare në Ministrinë e Jashtme, te pjesa substanciale mendoj se duhet të jemi të kujdesshëm për ta qepur si duhet këtë dokument, se ka të bëjë me politikën shtetërore tonën dhe nuk është thjesht një marrëveshje ndërkombëtare e radhës, që ne po kalojmë sot këtu", tha Bushati në Komision.