Mark Frroku: Vëllai im nuk mund të kthehet më në Shqipëri

Gjykata e Apelit në Hagë ka refuzuar ekstradimin e Arben Frrokut në Shqipëri me argumentin se i rrezikohet jeta, pasi dënimi është dhënë me ndikim politik.

Vendimi në favor të Frrokut u dha dje dhe është i formës së prerë. Në Shqipëri ai është dënuar me burgim të përjetshëm nga Gjykata e Apelit për Krime të Rënda për vrasjen e ish- kryekomisarit Dritan Lamaj. Sipas Gjykatës së Hagës, dënimi i dhënë në Shqipëri është dhënë bazuar mbi motive politike, duke shtuar se Frrokut i rrezikohet jeta në vendin e tij. Për këtë arsye ai nuk do të ekstradohet, edhe pse gjykatat shtetërore të Holandës kishin vendosur për ekstradimin e tij. Arben Frroku është dënuar nga Gjykata e Apelit me burg përjetë për vrasjen e komisarit Dritan Lamaj, ngjarje e ndodhur në shkurt të vitit 2013. Pas një kalvari gjyqësor, në prill të vitit 2015 Frroku u shpall i pafajshëm nga Gjykata e Krimeve të Rënda. Pasi doli nga qelia, Frroku u largua nga Shqipëria ditën që Apeli i Krimeve të Rënda rrëzoi vendimin e Shkallës së Parë dhe vendosi dënimin e tij me burgim të përjetshëm. Ndalimi i Arben Frrokut në Holandë është bërë fillimisht më 6 mars të vitit 2016, kur është thirrur në Zyrat e Emigracionit në Amsterdam, për të verifikuar dokumentet e identifikimit. Pasi është bërë një verifikim paraprak ai është lënë i lirë, por gjatë gjithë kohës, derisa u arrestua më 28 prill të atij viti, është mbajtur nën mbikëqyrje dhe të gjitha lëvizjet e tij në Holandë kanë qenë të kontrolluara. Kjo, për arsye sepse autoritetet vendëse kanë pasur dyshime në lidhje me pasaportën që ai kishte paraqitur në Zyrat e Emigracionit. Policia shqiptare konfirmoi arrestimin në atë kohë dhe tha se Ministria e Drejtësisë kishte nisur procedurat e ekstradimit, që tashmë nuk do të ndodhë.

Gjykata e Hagës ka vendosur në favor të Arben Frrokut, duke mos e lejuar ekstradimin në Shqipëri, por ai tashmë është i detyruar që të qëndrojë atje. Vëllai i tij, ishdeputeti Mark Frroku, tha dje për gazetën "Panorama" se ishin 3 arsye pse Gjykata vendosi që Arben Frroku të mos ekstradohej. E para, sepse i rrezikohet jeta, e dyta sepse është dënuar me burgim të përjetshëm dhe e treta sepse ky vendim është marrë i ndikuar politikisht.

Gjykata e Apelit në Hagë vendosi që vëllai juaj, Arben Frroku, të mos ekstradohej në Shqipëri. Cili ishte arsyetimi i Gjykatës?

Vendimi i Gjykatës së Apelit të Hagës, në fakt edhe ai i shkallës së Parë, ishte i mbështetur në 3 komponentë. E para lidhej me faktin se ndaj tij ishte dhënë një burgim i përjetshëm në Shqipëri, që në disa vende të Bashkimit Europian nuk ekziston. E dyta ka të bëjë me jetën e tij, që Gjykata çmon se i rrezikohet në vendin e tij dhe e treta, që është më e rëndësishme, të cilën unë e kam thënë edhe më parë dhe do vazhdoj ta them, është fakti se vendimi nga Gjykata në Tiranës është dhënë i motivuar politikisht.

Ndërkohë, gjykatat e Holandës kishin vendosur që të ekstradohej?

Po, gjykatat e shtetit holandez kishin dhënë ekstradim. Ato kanë një tjetër sistem. Vendimi i dhënë tani është i Gjykatës së të Drejtave të Njeriut në Hagë. Kjo gjykatë ka pezulluar të gjitha vendimet e shtetit holandez dhe ka marrë në dorë gjykimin e tij. Shkallën e Parë e ka fituar dhe sot fitoi edhe Shkallën e Dytë, që tashmë është një vendim i formës së prerë. Vendimin e Shkallës së Parë, që në fakt ishte i njëjtë me atë që u dha sot, e kishte apeluar prokurori.

Edhe Shkalla e Parë kishte dhënë të njëjtin arsyetim?

Po, po. Të njëjtë me arsyetimin që dha Apeli.

Arben Frroku është përfaqësuar atje nga ndonjë avokat i huaj?

Po, është përfaqësuar nga dy avokatë holandezë. Një burrë dhe një grua. Para një muaji isha vetë aty dhe mora pjesë në gjyq. Isha në sallë dhe kanë qenë prezentë të dy avokatët e Arbenit.

Pas këtij vendimi, a është liruar Arben Frroku?

Jo, ende nuk është liruar.

Nëse jeni në dijeni, si

procedurë, sa mund të zgjasë çështja e lirimit të tij?

Çështja e lirimit mund të zgjasë aq sa zgjat masa e arrestit. Ai ka pasur një masë arresti 30 ditë.

Ku ka qëndruar gjatë kësaj kohe?

Ka qenë në dy vende të ndryshme. Fillimisht ka qëndruar në një vend 2 vjet e 9 muaj, ndërsa së fundmi ishte në një vend tjetër, ku qëndroi 3 muaj.

Pas këtij vendimi, Arben Frroku do të qëndrojë atje?

Po, në Holandë i lirë.

Po familja?

Patjetër që po. Ai nuk lejohet që të hyjë vetëm në Shqipëri. Kjo është politika shqiptare. Dy orë pas ngjarjes, politika ka dalë dhe e ka bërë vrasës vëllain tim. Kjo nuk kishte ndodhur asnjëherë më parë. Po tashmë e ka dhënë përgjigjen Gjykata e të Drejtave të Njeriut në Hagë.