Nga Kukësi në Peqin për të vjedhur, arrestohet 24- vjeçari

ELBASAN – Policia e Peqinit ka mundur të zbardhë një sërë vjedhjesh, ndërsa ka arrestuar një nga autorët dhe ka shpallur në kërkim dy të tjerë. I arrestuari është një 24vjeçar nga Kukësi, i cili përdorte një mjet të vjedhur në Lushnje për të qarkulluar dhe futur sendet e vjedhura. Dyshohet se planet ai i kryente me dy bashkëpunëtorë, të shpallur tashmë në kërkim, ku njëri prej tyre është nga Peqini. Sipas Policisë, “Në vijim të punës për parandalimin e vjedhjeve, zbardhjen dhe vënien para përgjegjësisë ligjore të autorëve të vjedhjeve të ndodhura më parë, specialistët e Komisariatit të Policisë Peqin kanë bërë arrestimin e shtetasit I. J., 24 vjeç, banues në Has, Kukës ( i dënuar më parë për vjedhje). Ky shtetas është arrestuar në flagrancë, pasi dyshohet se në bashkëpunim me dy shtetas të tjerë kanë vjedhur një çiklomotor në pronësi të shtetasit B. S. Nga veprimet hetimore të kryera nga specialistët e Hetimit të Krimit në Komisariatin e Policisë Peqin, dyshohet se këta shtetas janë autorë edhe të 4 vjedhjeve të tjera të ndodhura më parë. Në bashkëpunim me njëritjetrin dyshohet se kanë kryer vjedhje në 3 banesa në Peqin dhe mjeti që përdornin për të lëvizur kur kryenin vjedhjet, rezultoi se këta e kanë vjedhur në Lushnje, mjet i cili u sekuestrua në cilësinë e provës materiale, së bashku me çiklomotorin dhe disa sende të tjera. Vijon puna për zbardhjen dhe dokumentimin e vjedhjeve të tjera, që dyshohet se i kanë kryer këto shtetas në bashkëpunim me njërin- tjetrin. Materialet i kaluan Prokurorisë së Rrethit Gjyqësor Elbasan për veprime të mëtejshme. m. s