Haradinaj, nën presion nga SHBA, BE e NATO për taksën
SHBA ndalon bashkëpunimin në fushën e sigurisë
Kryeministri i Kosovës, Ramush Haradinaj, është nën presion të madh nga politikanët vendës, të cilët i thonë se qëndrimi i tij për taksën ndaj Serbisë po rrezikon partneritetin me SHBA- në, por edhe nga aleatët më të ngushtë perëndimorë.
Kritikave për taksën e vendosur nga Qeveria e Kosovës ndaj produkteve me origjinë serbe dhe boshnjake i është shtuar edhe sekretari i përgjithshëm i NATO- s, Jens Stoltenberg. Por zëri më i fortë kundër qëndrimit në fuqi të kësaj takse ka ardhur nga SHBA. Në një letër drejtuar krerëve të institucioneve më të larta të Kosovës, zëvendësndihmësi i Sekretarit amerikan të Shtetit, Matthew Palmer, tha se taksa ndaj produkteve serbe dhe boshnjake i ka prishur raportet me Amerikën. Në letrën drejtuar Thaçit, Haradinajt dhe Veselit, të siguruar nga Televizioni Publik i Kosovës, thuhet se SHBA ka vendosur të stopojë bashkëpunimin në fushën e sigurisë, si kundërpërgjigje ndaj mosheqjes së taksës.
LETRA E PALMER “Ashtu siç ju ka shkruar edhe Presidenti Trump në letrën e tij në dhjetor të 2018, ky është momenti i mundësisë së Kosovës, për të normalizuar marrëdhëniet me Serbinë... Që atëherë ne kemi shprehur shqetësimet tona që veprime të caktuara, përfshirë këtu vendosjen e taksës ndaj produkteve serbe dhe boshnjake, do të mund të rrezikojnë këtë qëllim. Këto veprime minojnë mundësinë e Shteteve të Bashkuara të Amerikës që të vazhdojnë bashkëpunimin me ju në një fushë të gjerë objektivash të përbashkëta. Pasi pamë që kërkesat tona për të pezulluar taksën nuk u morën parasysh, kemi vendosur të ndërmarrim hapa që do të shfaqin shqetësimin tonë, përfshirë këtu edhe partneritetin në fushën e sigurisë. Do të shikojmë me kujdes aspektet e tjera të bashkëpunimit tonë dhe do të shqyrtojmë nëse edhe ato do të pakësohen/ shkurtohen. Kosova nuk ka mik më të mirë sesa Shtetet e Bashkuara... Është e pabesueshme që pas gjithë çfarë kemi bërë bashkë, Kosova e vlerëson miqësinë tonë aq ulët sa të injorojë këshillat tona... Qëllimi ynë është që të shohin Serbinë dhe gjithashtu Kosovën, të veprojnë me përgjegjësi dhe që t’i kthehen dialogut. Hapi i parë drejt këtij qëllimi do të ishte pezullimi i taksës. Derisa nuk e bëni një gjë të tillë, ne nuk mund të kemi raportet e fuqishme që kishim më parë me ju”, shkruhet mes të tjerash në letrën e Palmer. KRITIKAT NGA NATO Sekretari i përgjithshëm i NATO- s, Jens Stoltenberg, para takimit të ministrave të vendeve të aleancës për kthimin e FSK- së në Ushtri, tha se NATO është e shqetësuar me vendosjen e taksës nga Kosova për produktet serbe dhe boshnjake dhe kërkon re- spektimin marrëveshjeve të Brukselit. Sipas tij, Forcat e Sigurisë Vendore nuk mund të hyjnë në Veri pa lejen e komandantit të KFOR- it. Kryeministri i Republikës së Kosovës, Ramush Haradinaj, iu është përgjigjur deklarimeve të Stoltenberg, se në vend nuk ka Veri dhe Jug, por është Kosova në tërësi. “Ne i kemi ofruar NATO- s një protokoll të ri, nuk ka më Veri e Jug, është një Kosovë... Kosova nuk është e interesuar me krijuar doktrinë me qit ushtrinë kundër popullit të saj”, tha ai. DIPLOMATI GJERMAN
Njeri ndër diplomatët e Kancelares Merkel, raportuesi për Serbinë në PE, David McAllister, tha se “Vendimi i Qeverisë së Kosovës për taksën 100 për qind për mallrat nga Serbia dhe Bosnja është shkelje e qartë e CEFTA. I bëj thirrje Qeverisë në Prishtinë ta anulojnë këtë vendim në mënyrë që, shpresoj, që dialogu të vazhdojë”, ka thënë McAllister.