Dortmund e gjymtuar në Londër, pa katër titullarë ndaj Totenhemit
Borusia e Dortmundit do të luajë sot në Londër një nga ndeshjet më të rëndësishme në këtë sezon. Kryesuesit e Bundesligës do të përballen me Totenhemin në fazën e 1/ 8- ave të Champions- it. Por verdhezinjtë do të kushtëzohen nga mungesa e katër lojtarëve kryesorë në skuadër. Kapiteni Marko Rojs, sulmuesi Pako Alkaser, mbrojtësi Julian Vaigel dhe Lukas Pizçek nuk kanë udhëtuar me skuadrën për në Londër.
Që kapiteni i verdhezinjve do të mungonte ndaj Totenhemit kjo ishte e qartë nga të gjithë. Edhe në ndeshjen e luajtur ditën e shtunë ndaj Hofenhaimit në shtëpi, sulmuesi gjerman mungoi për shkak të një problemi muskulor.
Pako Alkaser vuan nga një dëmtim në shpatull dhe nuk mund të udhëtojë me skuadrën drejt Londrës. Një dëmtim ky i papritur për spanjollin. Ndërkohë, Julian Vaigel vuan nga një infeksion, ndërsa Lukas Pizçek ka probleme në shputën e këmbës.
Trajneri i Borusias, Lusien Favre, duhet të hedhë në fushë një formacion me shumë korrigjime. Mbrojtësi Zagadou mund ta nisë ndeshjen nga minuta e parë pas shumë javësh në stolin e rezervave. Por edhe kundërshtari do të zbresë në fushë pa disa prej lojtarëve më të mirë. Sulmuesi Heri Kejn nuk është i gatshëm pas një dëmtimi të pësuar disa javë më parë që do ta detyrojë atë të qëndrojë jashtë për disa javë. Edhe Dele Ali nuk do të jetë i gatshëm pas një problemi në kofshë.
Trajneri i verdhezinjve është i mendimit se ndeshja ndaj anglezëve do të jetë ndryshe nga ajo ndaj Hofenhaimit në kampionat. "Jemi të përqendruar te ndeshja e nesërme ( sotme) dhe më pas do të mendojmë për Bundesligën. Sigurisht që janë të ndryshme. Mungesat? Ashtu si ata, edhe ne kemi disa, por nuk kemi ardhur këtu për të folur për lojtarët që nuk do të jenë këtu", u shpreh trajneri zviceran. "Pësojmë shumë gola, por kjo nuk ka të bëjë me agresivitetin e pakët që shfaqim në fushën e lojës. Duhet të qëndrojmë të qetë dhe t'i marrim ndeshjet një nga një. Totenhemi është në vendin e tretë në Angli, kjo tregon gjithçka. DO të jetë e vështirë, por asgjë nuk është e pamundur".