Lista, shefat e rinj të shërbimeve në QSUT
Treçereku i krerëve nuk ndryshon, vetëm tetë shefa të rinj
Ministria e Shëndetësisë dhe ajo e Arsimit kanë firmosur emrat e rinj, që do të drejtojnë 32 shërbimet që ofrohen në Qendrën Spitalore Universitare “Nënë Tereza”.
Pas më shumë se dy muajsh është bërë publike lista e garës së re të zhvilluar që në nëntor të 2018- ës, por me emra të vjetër. Treçereku i krerëve duket se kanë “zënë rrënjë” në shërbimet përkatëse. Pas tetë vitesh, 24 mjekë do të vijojnë të jenë drejtues shërbimi në QSUT. Kjo është e para gjë që vihet re nga lista fituese ( përbri shkrimit), e cila nuk është e plotë për shkak të mosmarrëveshjeve të hasura në konkurs mes mjekëve. Për nëntë raste, zgjidhjen do ta japë Gjykata Administrative.
Në fakt, e gjithë procedura për përzgjedhjen e shefave të rinj ka ngjallur jo pak kënaqësi në radhët e mjekëve, të cilët ankohen për një garë fiktive dhe pa transparencë. Shumica e emrave në listë drejtojnë shërbimet përkatëse që prej vitit 2011, kur u përzgjodhën për të parën herë. Atyre u kishte mbaruar afati që në 2016- ën, por konkursi për caktimin e të rinjve, i cili rezultoi veçse një “refresh” i vogël, nuk u mbajt për dy vite rresht, duke e çuar shërbimin e tyre për një afat 8- vjeçar. Prej dy muajsh që nga organizimi i konkursit, shefat aktualë ushtronin veprimtarinë e tyre në paligjshmëri. Ngërçi mësohet të ketë qenë ministrja e Arsimit, Besa Shahini, pasi ajo e shëndetësisë, Ogerta Manastirliu, kishte kohë që kishte firmosur listën e të zgjedhurve. Por ngërçi nuk ka qenë vetëm në tryezën e ministres Shahini. Seancat gjyqësore duket se do të pasojnë njëra- tjetrën, pasi Komisioni për Vlerësimin e kandidatëve mësohet të ketë përzgjedhur fitues kandidatë pa diplomën e shërbimit përkatës.