Dëshmia e policit: Videot m’i vodhën nga telefoni në servis
“Pak ditë para publikimit të pamjeve, telefonin e dërgova në një servis. S’kam ngacmuar seksualisht asnjë vajzë minorene”
“Nuk di ta përdor shumë mirë telefonin, besoj që dikush ma ka vjedhur videon dhe e ka publikuar në media online”.
Këtë ka deklaruar polici i arrestuar për ngacmim seksual, Berhan Bajrakurtaj. 53- vjeçari nuk e ka pranuar akuzën e ngacmimit të një vajze minorene, por pavarësisht kësaj, Gjykata e Shkallës së Parë në Shkodër caktoi masën e sigurisë “arrest me burg” me afat 30 ditë. Vendimi u mor pas kërkesës së prokurorit Vat Staka për kryerjen e akt- ekspertimit të telefonit të efektivit të Malësisë së Madhe. Gjykata shpalli dhe moskompetencë për këtë çështje, duke ia kaluar për shqyrtim Gjykatës për të mitur, duke bërë që automatikisht të mbetet në fuqi kërkesa e prokurorit për masë sigurie “burg me afat”. Në sallën e gjyqit, Berhan Bajrakurtaj ka mohuar akuzën për ngacmim seksual ndaj një vajze 15- vjeçare, duke thënë se nuk ka asgjë të vërtetë në këtë mes. Polici, gjithashtu babai i katër fëmijëve, ka deklaruar se ai ka qenë në shtëpi kur ka regjistruar videon që më pas u publikua në media dhe se materialin filmik nuk ia ka dërguar askujt. Lidhur me faktin se si kanë dalë në publik këto pamje, 53- vjeçari ka thënë se disa ditë para kësaj ngjarjeje, e kishte dërguar celularin e tij në një servis për ta rregulluar. Por pavarësisht se i kishte vendosur kod, ai dyshohet se mund t’i kenë kopjuar videot që kishte të ruajtura. Por, kjo mbetet në kuadër të dyshi- meve të tij, pasi i pyetur se kush mund ta ketë publikuar videon, Bajrakurtaj thotë se nuk e ka idenë as se si ka dalë nga celulari i tij, por mohon kategorikisht se ka ngacmuar seksualisht ndonjë të mitur. Këtë akuzë që i bëhet dhe që rëndon mbi të, Bajrakurtaj e ka quajtur një shpifje të rëndë ndaj tij dhe se dikush mund t’ia ketë bërë me qëllim për ta dëmtuar. Inspektori i Malësisë së Madhe gjithashtu ka thënë përpara Gjykatës se nuk di që ta përdorë dhe aq mirë celularin e tij “smartphone” dhe se mbase dikush mund të ketë abuzuar me këtë fakt. 53- vjeçari thotë se nuk është treguar shumë i kujdesshëm në këtë aspekt, duke e lënë edhe në tavolina të ndryshme kur qëndronte në mjedise publike. Gjyqtarja Irida Kacerja shpalli moskompetencën, ndërsa mbeti në fuqi kërkesa e prokurorit të Prokurorisë të Rrethit Gjyqësor Shkodër Vat Staka, “arrest me burg” me afat 30 ditë për dërgimin e ndonjë prove tjetër. Pas 30 ditësh, polici Bajrakurtaj do të dalë sërish para Gjykatës për të kërkuar që të lirohet, duke qenë se pretendon se nuk ka asnjë ngacmim seksual nga ana e tij. Nga ana tjetër, Gjykata do të presë prova të reja nga Prokuroria për të faktuar dyshimet mbi efektivin.