Hakmarrja e Palokës, sulm me bojë Ramës në Kuvend
PD: Veprimi si reagim i bulizmit të Kryeministrit ndaj tij
Ndonëse ishte parashikuar si një mbledhje protokollare, ku partitë politike do të votonin për anëtarësimin e Maqedonisë së Veriut në NATO, seanca e djeshme parlamentare nuk kaloi pa incidente.
Në hapje të seancës, Kryetari i Kuvendit Gramoz Ruçi njoftoi deputetët se në sallë ishte i pranishëm edhe kryetari i Parlamentit të Maqedonisë së Veriut, Talat Xhaferri, i cili do të mbante një fjalë përshëndetëse pas votimit të projektligjit që ishte e vetmja pikë në rendin e ditës. Pas kësaj, zyra e shtypit e Kuvendit njoftoi se të gjithë deputetët e opozitës kishin regjistruar emrin për të diskutuar për këtë projektligj. Kësisoj, demokratët ishin përgatitur për të zhvilluar një debat të ashpër në Kuvend. Ajo që tensionoi situatën ishte reagimi i Kryeministrit Rama pas fjalës së kryetarit të PD- së, Lulzim Basha, i cili theksoi se vendi është në një situatë morti dhe se dyert e Europës janë mbyllur për Shqipërinë. Këto deklarata të Bashës sollën reagimin e Ramës, i cili e cilësoi kreun e opozitës si një fëmijë që nuk di se çfarë thotë e çfarë bën. Rama i tha këto fjalë me argumentin se Basha kishte thyer kodin e mikpritjes, pasi mbledhja e djeshme e Parlamentit duhet të ishte thjeshtë protokollare. Pas përfundimit të replikës së Ramës dhe në foltoren e Kuvendit doli Fatmir Mediu për të përshëndetur miratimin e projektligjit, nënkryetari i PD- së Edi Paloka iu afrua vendit ku qëndron kreu i ekzekutivit, duke i hedhur bojë në fytyrë. Paloka e kishte futur bojën në një shiringë, të cilën e mbante në xhepin e djathtë të xhaketës së tij dhe në momentin kur iu afrua Ramës, shtyu pistonin e shiringës duke i hedhur bojën në fytyrë. Ky veprim i Palokës bëri që Ruçi ta përjashtonte nga seanca dhe të ndërpriste punimet e Kuvendit për të mbledhur Byronë e Kuvendit. Por Paloka nuk pranoi të dilte nga salla, duke iu drejtuar Ramës e duke i thënë: “Thuaj tani thhhhhh”. Pas ndërprerjes së punimeve të Parlamentit, selia blu, nëpërmjet një komunikate për gazetarët, njoftoi se akti i Palokës kishte ardhur pas bulizmit të Ramës ndaj tij në seancën e shkuar. “Edi Paloka e gjuajti me bojë Edi Ramën, pasi ai e talli në mënyrë të përsëritur për shkak të mënyrës së të folurit. Gjuajtja me bojë është mospranim i bulizmit të ushtruar nga Kryeministri, për të cilin është dëshmitar i gjithë opinioni publik”, sqaroi PD në komunikatën e saj.
Pas përfundimit të seancës plenare, Kryeministri Rama reagoi nëpërmjet një statusi në “Twitter”, ku vijoi ironinë e tij ndaj mënyrës se si flet Edi Paloka. “Dy gjëra janë të pafundme, universi dhe budallallëku i njeriut, shkruante Albert Ainshtajni, përpara se sa opozita në Shqipëri të merrte formën e një budallallëku universal, që vizion ka Vezën e Lulit, ide ka Çizmen e Doktoreshës dhe program ka Bojën e Palothës. Penda e mendimtarit E. Th. Palotha pas një derdhjeje të fuqishme mendimesh mbi rolin e opozitës në zhvillimin e vendit”, shkroi Rama.