SHBA: Dhuna kundër institucioneve, e papranueshme
Soreca: Presim që manifestimi paqësor të mos kthehet në dhunë
Shtetet e Bashkuara të Amerikës dhe Bashkimi Europian, përmes selive diplomatike në Tiranë kanë bërë apel që protesta e thirrur nga opozita këtë të shtunë të mos ketë akte dhune. Përmes një reagimi në faqen e saj zyrtare, ambasada e SHBA- ve në Tiranë e cilësoi të papranueshme mundësinë e ushtrimit të dhunës kundër njerëzve dhe institucioneve ditën e shtunë. “E drejta e qytetarëve për t’u mbledhur, për t’i bërë kërkesa qeverisë dhe për të protestuar për ndryshim pozitiv, janë simbole të një shoqërie demokratike të lirë dhe të shëndetshme. Është një e drejtë që ushtrohet shpesh në Shtetet e Bashkuara. Megjithatë, kjo e drejtë duhet ushtruar paqësisht. Dhuna kundër njerëzve ose pronës është e papranueshme. Ne iu bëjmë thirrje të gjithë atyre që janë përfshirë në protestën e së shtunës dhe të gjithë udhëheqësve politikë shqiptarë, të refuzojnë dhunën dhe të sigurohen që protestat të zhvillohen paqësisht dhe në mënyrë konstruktive”, thuhet në reagimin e ambasadës. Në të njëjtin qëndrim ishte edhe ambasadori i BE- së në Tiranë, Luigi Soreca, i cili theksoi se pritet që manifestimi i 16 shkurtit të jetë paqësor, duke kujtuar se vendi është në një moment të veçantë sa u takon detyrave që duhet të përmbushë për çeljen e negociatave. “Ky është një moment me rëndësi për Sh- qipërinë, në kuptimin që e drejta e tubimit, e drejta e fjalës janë një pjesë thelbësore e çdo shoqërie demokratike. Por është gjithashtu e vërtetë që këto të drejta duhet të ushtrohen në mënyrë paqësore. Prandaj, presim një manifestim paqësor, që të mos kthehet në dhunë. Kjo është një thirrje për të gjitha palët e përfshira”, theksoi ambasadori Soreca. Edhe ambasadori britanik në Tiranë, Duncan Norman kërkon që protesta e 16 shkurtit të jetë paqësore. “Britania e Madhe e shikon të drejtën për të protestuar si një të drejtë fondamentale të demokracisë. Megjithatë të tilla demonstrata me patjetër duhet të jenë paqësore nëse ato zhvillohen në mbështetje të demokracisë. Në u bëjmë thirrje atyre që do të përfshihen në protestën e të shtunës ta respektojnë këtë princip. Protestë paqësore”, deklaroi Norman.