‘ Shqipëria po jeton mortin e rënies së shtetit’, Basha: Sistemi duhet përmbysur
“Në radhët e maxhorancës, 1 në 3 mandate nuk përfaqëson votën e socialistëve, përfaqëson votën e kriminelëve dhe trafikantëve”
Kryetari i opozitës, Lulzim Basha, është i bindur se zgjidhjet politike me Kryeministrin dhe qeverinë kanë mbaruar, ndaj edhe ka ftuar shqiptarët që ta përmbysin Edi Ramën këtë të shtunë përmes protestave popullore.
Nga salla e Parlamentit, ku maxhoranca dhe opozita kishin shprehur dakordësinë e plotë për ratifikimin e Marrëveshjes së Anëtarësimit të Maqedonisë së Veriut në NATO, Basha i kujtoi kreut të Kuvendit maqedonas, Talat Xhaferri, se Shqipëria po përjeton mortin e rënies së demokracisë në vend. “Z. Xhaferri, ky është morti i dytë, në të cilin jeni i pranishëm, morti i rënies së shtetit ligjor në Shqipëri, morti i rënies së demokracisë në Shqipëri. Kjo qeveri dhe ky kryehajdut janë sot lakuriq para syve tuaj dhe para syve të botës, sepse janë kapur duke vjedhur. Këta hajdutë, me lekët që kanë vjedhur nga taksat e shqiptarëve, kanë blerë edhe këto karrige ku ulen përditë. 1 në 3 mandate nuk përfaqëson votën e socialistëve, përfaqëson votën e kriminelëve, e trafikantëve të drogës, e narkokarteleve që e kanë shndërruar këtë në një narkoqeveri dhe Shqipërinë në një narkoshtet, të cilin mediat ndërkombëtare dhe diplomatët e quajnë Kolumbia e Europës. Shumica dërrmuese e shqiptarëve varfërohen çdo ditë nga kjo klikë hajdutësh. Shumica dërrmuese e shqiptarëve poshtërohen ditë për ditë nga ky sistem dhe i pari i tij. Ndaj, ky sistem duhet përmbysur. Përmbysur”, tha Basha. OFERTA
Ashtu siç ka propozuar gjatë turit të tij në Shqipëri, Basha përsëriti nga foltorja e Parlamentit se zgjidhja e vetme politike për t’i dhënë fund krizës në vend është krijimi i një qeverie tranzitore dhe zhvillimi i zgjedhjeve të parakohshme. Kreu i PD- së vuri në dukje talljet dhe indiferencën e Kryeministrit përpara çdo skandali dhe denoncimi të opozitës, duke shtuar se zgjidhjet politike janë ofruar vazhdimisht nga demokratët, por ato janë refuzuar. “Fjalëpistë, fyes, indiferent dhe poshtërues ndaj popullit, kryehajduti që është kapur duke vjedhur refuzon të japë të vetmen zgjidhje politike, që mund të ketë sot vendi. Zgjidhja politike e vetme për të shmangur krizën totale është ajo e një qeverie tranzitore, me një Kryeministër të pakapur nga krimi dhe zgjedhjeve të parakohshme, për të ngritur një Parlament me të vërtetë të popullit. Ne i provuam të gjitha: ta pastrojmë nga koka, me ligje, me amendamente, me iniciativa, ta pastrojmë nga brenda. Dhe sot, të gjithë e kanë kuptuar se pa e përmbysur këtë sistem, nuk mund të ngremë asgjë të re dhe asgjë të mirë për njerëzit. Ndaj, ditën e shtunë përballja është e qartë: Matanë gardhit të policëve është kryehajduti i kapur në vjedhje, përballë tyre është populli vjedhur”, deklaroi kreu i PD- së. Sipas Bashës, Shqipëria nuk mund dhe nuk do ta marrë hapjen e negociatave. Për kreun e PDsë, Europa ia ka mbyllur derën kësaj shumice, ndaj edhe kërkoi nga shqiptarët ta hapin derën e Europës ditën e shtunë, si të vetmin shpëtim për Shqipërinë.