Kryemadhi: Protesta e 16 shkurtit, më qëndresëtarja që është organizuar
Kryetarja e LSI- së, Monika Kryemadhi, paralajmëron se protesta e 16 shkurtit do të jetë protesta më qëndresëtare që kanë parë ndonjëherë shqiptarët. Në një dalje në emisionin “Opinion”, Kryemadhi garantoi se opozita do të organizojë një protestë paqësore, por do të jenë qytetarët ata që do të përcaktojnë dinamikën e zhvillimeve. “Qytetarët janë ata, që për hir të së vërtetës, në ditët e fundit janë organizatorët kryesorë të protestës. Ne si parti politike, ndryshe nga të gjitha organizimet e tjera, ku strukturat e partisë kanë qenë iniciatorë të organizimit, sot nuk janë. Janë qytetarët ata që janë organizatorët, janë qytetarët që i kanë vendosur përballë politikanët për të dalë në protestë ditën e shtunë. Protesta e 16 shkurtit do të jetë protesta më paqësore, por edhe protesta më qëndresëtare që kanë parë ndonjëherë shqiptarët”, tha Kryemadhi. Kryetarja e LSI- së mohoi që forca e saj politike të hyjë në një marrëveshje me Edi Ramën dhe sqaroi se, nëse protesta nuk do të japë rezultat, do të jetë vetë opozita që do të largohet. “Mund të them që marrëveshja e partive të frontit opozitar e ka jashtëzakonisht shumë të qartë se çdo të thotë qeveri tranzitore apo kalimtare. Për ne si opozitë, nuk ka rëndësi rrotacioni politik. Harrojeni që, qoftë PD, qoftë LSI apo kushdo tjetër, do rrotacion politik në tavolinë. Rrotacioni politik vjen vetëm nëpërmjet votës. Ky është një manipulim që kërkon të bëjë Edi Rama me falangat e tij. Nëse nuk largohet Edi Rama, do të ikim ne se s’ka kuptim. I bie që ai të jetë më i fortë se shumica e shqiptarëve”, theksoi kryetarja e LSI- së.