SHBA, presion BE- së për paktin me Iranin
Nënpresidenti amerikan, Mike Pence, u ka bërë thirrje aleatëve në BE që të tërhiqen nga marrëveshja bërthamore me Iranin e vitit 2015, duke akuzuar bllokun se po përpiqet të minojë presionin amerikan ndaj programit nuklear të Teheranit, madje ka shtuar se Irani po përpiqet të sjellë “një holokaust tjetër”. Pence u shpreh se “është e trishtueshme, disa nga partnerët tanë kryesorë europianë nuk kanë qenë as afër bashkëpunimit. Në fakt, ata kanë udhëhequr përpjekjet për të krijuar mekanizma për të thyer sanksionet tona…”. Gjatë deklaratës së tij në Varshavë në konferencën për Lindjen e Mesme, Pence shtoi se përpjekja për të rritur tregtinë me Iranin ishte “një përpjekje për të thyer sanksionet amerikane kundër regjimit revolucionar vrasës iranian. Është një hap i keqkëshilluar, që do të shërbejë vetëm për të forcuar Iranin, të dobësojë BE- në dhe të krijojë më shumë distancë mes Europës dhe SHBA- së”. Irani ka mbajtur gjithnjë kurs kundërshtari ndaj administratës Trump dhe Pence tha të enjten se vendi po përpiqet të sjellë një tjetër holokaust. Ai e ka quajtur Iranin “shtetin kryesor që sponsorizon terrorizmin në botë”. Shtetet e Bashkuara u tërhoqën nga marrëveshja bërthamore e Iranit vitin e kaluar dhe vendosën sanksione ndaj Teheranit. Administrata Trump fillimisht tha se Irani do të ishte fokusi i konferencës së Varshavës, por organizatorët e zgjeruan programin, duke përfshirë diskutimin për mosmarrëveshjet izraelito- palestineze dhe luftën kundër ISIS.