Morati sulmon Marotën: Lajmi të mos publikohej

Çdo çështje në ambientet e Interit ka kaluar në plan të dytë, pasi aktualisht po mbizotëron polemika me kapitenin Mauro Ikardi. Vendim drastik ai i klubit zikaltër, që vendosi t'i heqë shiritin argjentinasit për t'ia besuar Handanoviçit. I grumbulluar për transfertën e djeshme në Vjenë, numri 9 vendosi ta dezertojë duke konfirmuar krisjen me drejtuesit për çështjen e rinovimit. Rreth situatës ka folur për mediat italiane edhe ish- presidenti historik interist, Masimo Morati.

A jeni i habitur me sa ka ndodhur?

Po, sepse veprimi i klubit më është dukur i kotë, por do kenë arsyet e tyre dhe ndoshta është një strategji e brendshme, ku unë nuk mund të ndërhyj dhe të informohem.

Si president, ju nuk do e kishit kryer një lëvizje kaq të fortë?

Nuk i di kushtet, ndaj s'mund t'i kuptoj motivimet. Sipas mendimit tim, në mes të kampionatit, nëse ekziston mundësia për ta shitur, nëse duan t'i kapin objektivat që kanë caktuar, do thosha "jo".

Çfarë ideje keni krijuar me gjithë deklaratat e Vandës, Ikardit, Spaletit dhe Marotës?

Gjithçka është bërë publike. Dikur rinovimet e kontratave nuk shpreheshin hapur. Blerja po, ishte e rëndësishme, ndërsa rinovimi diçka që do shpallej në momentin e duhur. Tani gazetat shkruajnë lajme nga më të ndryshmet dhe çdokush është i detyruar të japë përgjigje.

Si e gjykoni veprimin e Ikardit për të mos shkuar në Vjenë?

Sa ka ndodhur mbetet të qartësohet nga klubi, pasi për momentin vetëm po luhen lojëra: "është faji i tij, është faji im...". Dhe kjo është diçka e shëmtuar, sepse largon gjithmonë e më shumë lojtarin nga klubi dhe anasjelltas. Ndoshta do kenë avantazhet e tyre, të na thonë se cilat janë.

Keni "melankoli" për kapitenët tuaj, Bergomi e Zaneti?

Kam gjetur një kapiten të mirë edhe me Ikardin, gjithmonë ka luajtur me entuziazëm, seriozitet dhe profesionalizëm, ndaj nuk kam asgjë për të thënë.