Djegia e mandateve, emrat e rinj të PD për në Kuvend
Si veprojnë KQZ dhe Kuvendi për listën e kandidatëve të PD
Kërkesa e kryetarit të Partisë Demokratike, Lulzim Basha, për djegien e mandateve parlamentare, do të kërkojë një mirëkuptim me të gjithë kandidatët e paraqitur nga PD për zgjedhjet parlamentare të vitit 2018.
Kjo, pasi Kodi Zgjedhor ka parashikuar rastet kur përfundon mandati i deputeti dhe si veprohet për zëvendësimin e tij. Konkretisht, neni 164 i Kodit Zgjedhor thekson se pas ndërprerjes së mandatit të një deputeti, Kuvendi i dërgon kërkesën Komisionit Qendror të Zgjedhjeve për zëvendësimin e vakancës. Këtu futet në lojë më pas mirëkuptimi me të gjithë kandidatët. Kjo, pasi Partia Demokratike, pasi arriti marrëveshjen me partitë opozitare, vendosi që të garojnë nën një sigël të vetëm të gjitha partitë si: PD, PBDNJ, PDK, LZHK, PD dhe PAA, duke plotësuar listën prej 140 kandidatësh me përbërje nga disa forca politike. Referuar Kodit, neni 164 shprehet se: “Në këtë rast, Kuvendi, jo më vonë se 30 ditë, njofton KQZ- në për krijimin e vakancës. Mandati i ndërprerë i deputetit i kalon kandidatit vijues të listës së të njëjtës parti politike në zonën zgjedhore përkatëse. KQZ merr vendim për dhënien e mandatit kandidatit të radhës në listën e kandidatëve të regjistruar. Nëse kandidati i radhës nuk paraqitet në Kuvend brenda 30 ditëve nga njoftimi, pa shkaqe të përligjura, mandati i kalon kandidatit vijues të listës. E njëjta procedurë vazhdon deri në shterimin e listës së kandidatëve të së njëjtës parti politike”.
Por nëse organet më të larta vendimmarrëse të PD- së vendosin për djegien e mandateve dhe ky vendim merret në mënyrë konsensuale nga të gjithë kandidatët në listë, si do të veprohet për zëvendësimin e tyre? Kodi Zgjedhor, në nenin 164, pika 4, thekson se vakancat e krijuara i kalojnë partisë që ka herësin më të madh në bazë të formulës. Por në zgjedhjet parlamentare të vitit 2017, partitë politike nuk u regjistruan në zgjedhje si koalicione parazgjedhore dhe në këtë mënyrë, vendet e lëna bosh nga deputetët që japin dorëheqje, mbeten të pazëvendësueshme duke krijuar një vakum prej 62 ligjvënësish në sallën e Kuvendit. Konkretisht, pika 4 e nenit 164, thekson se: “Në rast kur është shteruar lista e kandidatëve të partisë politike, anëtare e një koalicioni, mandati i kalon partisë së ko- alicionit me herësin më të lartë. Kur mandati i ndërprerë i përket një kandidati të propozuar nga zgjedhësit, mandati i kalon subjektit zgjedhor me herësin më të lartë. Kur mandati i takon një koalicioni zgjedhor, ai i shpërndahet partisë pjesëtare të koalicionit me herësin më të lartë”.