Pandeli Koçi: Sigurimi i Shtetit ka falsifikuar firmën time
Firmën në fund të aktekspertizës së poezive të Visar Zhitit, poeti dhe ish- redaktori i shtëpisë botuese "Naim Frashëri", Pandeli Koçi, e konsideron një manipulim të ish- Sigurimit të Shtetit. Këtë fakt, ai thotë se e ka mësuar pasi kishte ndodhur gjyqi i poetit. Ky reagim i Koçit erdhi pas kërkesës publike për sqarim nga ana e shkrimtarit Agron Tufa, i cili botoi edhe faksimilet e aktekspertizës me emrat e firmëtarëve. Ai jo dërgoi në gazetën "Panorama" një letër të hapur, e cila i përgjigjet vetëm Tufës, por edhe shpjegon pozitat e tij karshi kësaj akuze. Në këtë letër, Koçi shprehet se është në dijeni të kësaj çështjeje dhe se nuk është ai që ka marrë pjesë në procesin e ekspertimit të poezive të Visar Zhitit. Ai shprehet se e ka sqaruar më herët këtë çështje me Zhitin, i cili, sipas Koçit, edhe vetë i ka treguar se e njëjta ekspertizë i është treguar më herët, firmosur nga një tjetër redaktor. "Pas vitit 1991, vetë Visari ( me të cilin kemi punuar në Kuvendin e Republikës) më ka treguar: ' Hetuesi më solli për të lexuar ekspertizën të firmosur nga redaktori përkatës. Unë i thashë: Ky është mendimi i një redaktori. Pas ca ditësh, po këtë tekst e sollën edhe me emrin e firmën tënde'. Pra, ekspertiza nuk mund të ishte shkruar nga unë, sepse ishte i njëjti tekst i paraqitur më parë. Sigurimi i Shtetit, për të ' legalizuar' qëllimet e tij, nuk e kishte vështirë të falsifikonte firmën time. Kjo ishte një taktikë e Sigurimit për të treguar se vetë shkrimtarët denoncojnë njëritjetrin", shkruante ndër të tjera Koçi.