Laçi fiton ndaj Partizanit mes polemikash
Flamurtari shtang Skënderbeun, Kastrioti mund Kamzën për mbijetesë
Tirana merr një pikë me forcë, falë perlës së Uinful Kobinasë.
Nga ana tjetër, Luftëtari duhet të qajë dy pikët e humbura në kryeqytet. Ekipi i Ahmatajt bën një ndeshje pothuajse perfekte për 93 minuta, duke pasur edhe shansin e mbylljes së takimit. Një ndeshje e mbyllur në barazim 1- 1, por që mund të kishte tjetër rezultat. Gjithsesi, një pikë shprese për Luftëtarin dhe qetësi relative për Tiranën, që nëse do të kishte humbur, sigurisht do të kishte shkatërruar dy muaj punë gjatë 90 minutëshit të djeshëm. Luftëtari i rreshtuar mirë kërkon të mos pësojë gol, por me rastin e parë të ndërtuar shënon gol. Top nga e djathta në të majtë, ku Demo ndjek Kërçikun jep një top në gjysmëlartësi në qendër dhe aty Aleksi në shpejtësi gjuan menjëherë dhe 0- 1. Tirana nuk u beson syve, pasi disavantazhi është i rëndë. Bardheblutë hidhen në sulm dhe menjëherë Turtulli ka një rast të madh për të shënuar, por gjuajtja e tij është e pasaktë. Deri në minutën e 48- të kur mbyllet pjesa e parë, të dyja skuadrat luftojnë në mesfushë pa arritur pothuajse asgjë. Në minutën e 51- të, Hoxhallari merr krahun pas pasit të Imamit, kroson në qendër, aty Ngo godet me kokë, por sfera shkon mbi traun e portës. Pesë minuta më vonë Rapa ka një mundësi të artë për të shënuar, por gjuajtja e tij shkon mbi traun e portës. Minuta e 93- të Rrëmujë para zonës së Luftëtarit, topi i del rastësisht Kobinasë, me afrikanin që shkarkon një të djathtë menjëherë, duke shënuar një supergol 1- 1 dhe Tirana qetësohet.
LAÇI- PARTIZANI 1- 0
Laçi i trajnerit Besnik Prenga ka frenuar marshimin e Partizanit, i cili dje nuk diti të përfitojë për të thelluar distancën me ndjekësit. Takimi u vendos nga një episod, ku në fitoren e Laçit ndikim pati edhe asisti i gjyqtarëve. Në minutën e 11- të, gjyqtari Koçi në sinkron me asistentin Avdo, akorduan një penallti të dyshimtë për kurbinasit. Pas kontestimit të miqve, në të 13- ën Shtubina finalizon nga pika e bardhë. Goli i shkodranit mbeti si gjuajtja e vetme në portë për këtë ndeshje, ndonëse minutat totale të lojës ishin 98- të. Partizani me sa duket kishte harruar armatimin në shtëpi, pasi ndaj Laçit nuk kishte asnjë fishek me vete. Për 98 minuta, në asnjë rast të kuqtë nuk e dërguan topin në kuadratin portës laçiane, por edhe vendësit nuk e bënë një gjë të tillë me aksion të rrjedhshëm. Laçi mori fitoren e parë në kampionat për 2019- n, ndërsa Partizani nuk e njihte humbjen që nga transferta e Vlorës, ku më 23 nëntor 2018 u mundën 1- 0. Kjo humbje e të kuqve, që vjen pas 8 javësh kampionat, e mban akoma të hapur luftën për titullin. Teuta është 7 pikë larg "demave", ndërsa Kukësi i treti është - 8. Në transfertën e Laçit u pa një Partizan pa ide, me motor të fikur, me lojtarë që bënin individualistin, sikur po luanin kalçeto, jo si një ndeshje nga e cila mund të hidhnin një hap të madh drejt titullit. Ndeshja u karakterizua nga dyluftimet e ashpra, kryesisht në mesfushë dhe nga shtrirjet e ekzagjeruara të vendësve, të cilët arritën të administrojnë golin e minutës së 13- të.
FLAMURTARISKËNDERBEU 2- 0
Flamurtari zë "mat" Skënderbeun me një... lëvizje. Një dëmtim i Fjoralb Deliajt në nxehmje solli aktivizimin e Andi Ribajt. Dhe ky ndryshim solli praktikisht edhe fitoren. Fieraku shënoi gol dhe i dha tjetër impuls sulmit të vlonjatëve. Ai që i vendosi "vulën" këtij triumfi ishte Emiljano Musta në sekondat e fundit të shtesës, duke likuiduar një rival direkt dhe shpresuar ende për një vend në Kupat e Europës. Korçarët nga ana tjetër vinin "të dehur" nga kthesa e një jave më parë me Laçin, por në Vlorë sigluan të 7- n humbje për 8 javët e fundit. Bardhekuqtë e nisën të përgjumur këtë takim, aq sa për pjesën e parë nuk arritën që godisnin kurrë portën. E megjithatë, shanset për të marrë minimalisht një pikë nga kjo transfertë ishin reale, por u ndëshkuan nga egoizmi i tepruar i Oto Xhon.
KAMZA- KASTRIOTI0- 1
Dy ish- ë, një finale mbijetese dhe një... hakmarrje. Devolli dhe Ymeraj u futën në stadiumin "Kamza" me emocionet e së shkuarës, por dolën triumfatorë dhe me ëndrrën për të siguruar mbijetesën në Superiore. Kundërsulm vrasës dhe Ersil Ymeraj kalibron të djathtën në cepin e trekëndëshit të Avdylit, duke realizuar një perlë për tri pikë dhe shkëputjen nga Kamza. Pas javës së 22- të, Kastrioti fiton derbin e mbijetesës dhe shpreson më shumë se kurrë, duke e lënë Kamzën 3 pikë pas dhe pa trajner, pasi Gjoka dha dorëheqjen nga kryeqytetasit.