Duka, dakord me Bashën për mandatet
"Edhe pse tri mandate në listat e PD janë të PAA, do t'i dorëzojmë"
Pas daljes në një deklaratë publike, ku Lulzim Basha propozoi që opozita të djegë mandatet, dolën edhe reagimet e aleatëve. I pari që u shpreh pro kësaj ishte kryetari i PDIU- së, Shpëtim Idrizi, i cili theksoi se propozimi i kreut të PD- së për qeveri tranzitore dhe zgjedhje të parakohshme është zgjidhja e duhur për të kapërcyer krizën politike. "PDIU mbështet vendimin e PD- së për t'i dhënë zgjidhje politike vendit, si i vetmi instrument që politika e përgjegjshme ka për të zgjidhur krizën shumëdimensionale që sot ka kapluar vendin, krizë politike, ekonomike, sociale dhe krizë përfaqësimi, nëpërmjet zgjedhjeve të parakohshme dhe një qeverie tranzitore, që do të garantojë që shqiptarët të votojnë dhe të zgjedhin për herë të parë të lirë. Vlerësojmë propozimin e z. Basha për djegien e mandateve, si një shprehje e vullnetit të qartë, që para zërit të qytetarëve dhe nevojës së vendit për zgjidhje politike, nuk vuri status quo(- në) e një Parlamenti ilegjitim, por bëri fakt zgjidhjen politike që kjo max- horancë po e refuzon me arrogancë", theksoi Idrizi. Pas tij erdhi edhe reagimi i Agron Dukës. Kryetari i PAA- së, i cili nuk është deputet, por që e përfiton mandatin nëse japin dorëheqjen deputetët e PD- së, u shpreh se nëse vendimi merret në mënyrë konsensuale, as ai nuk do ta pranojë mandatin e deputetit. "Nëse opozita parlamentare gjykon se kanë shteruar të gjitha rrugët politike dhe vendos të djegë mandatet, ne do të respektojmë vullnetin e saj. Edhe pse tri mandate në listat e Partisë Demokratike u përkasin kandidatëve të Partisë Agrare Ambientaliste, ne do t'i dorëzojmë ato, pasi nuk mund të jemi pjesë e një Parlamenti ilegjitim. Ky akt politik i opozitës shënon fillimin e një faze të re, në të cilën, të gjithë bashkë, duhet të gjejmë forcën për të sjellë një ndryshim real, jo vetëm për t'i dhënë fund tjetërsimit të zgjedhjeve, por për të hedhur themelet e një sistemi zgjedhor të drejtë, demokratik dhe përfaqësues.