Seancë solemne në Kuvend, Veseli: Qeveria nuk bie nga taksa

Kryetari i Kuvendit të Kosovës, Kadri Veseli, në seancën solemne të Kuvendit në 11- vjetorin e Pavarësisë së Kosovës, tha se taksa ndaj Serbisë ka qenë vendim i drejtë. Kryeparlamentari ka thënë se kjo taksë nuk do të jetë arsye për rrëzimin e Qeverisë së Kosovës dhe prishjes së koalicionit. "Serbia e ka merituar taksën karshi nesh. Vendimmarrja shtetërore nuk duhet të jetë personale, pra, ky vendim duhet të jetë institucional. Me SHBA- të dhe BE në krah Kosova është më e sigurt. Interesat e SHBA- ve janë edhe interesat tona. Qeveria nuk do të bjerë për shkak të taksës dhe Serbisë, qeveria do të bjerë vetëm për interes të qytetarëve", ka thënë Veseli. Historinë e Kosovës, Veseli e ka vlerësuar si histori të sakrificave, duke shtuar se Kosova ka si synim integrimin euroatlantik. Ai shtoi se Kosova shkon në dialog për të marrë njohje dhe integrim në NATO dhe BE. "Ne në dialog nuk shkojmë vetëm për një marrëveshje me Serbinë, ne shkojmë në dialog të arrijmë një paqe afatgjatë. Largimi i ndikimit rus në rajon nuk është vetëm i SHBA- së, por edhe i vendit tonë. Veprimet e tilla nuk çojnë askund. Ne duhet të qëndrojmë të bashkuar përballë Serbisë, ne kemi një qëllim të njëjtë. Njohjen e Kosovës nga Serbia, integrimi në NATO dhe BE", deklaroi Veseli. Qeveria e Kosovës zhvilloi po ashtu një mbledhje solemne të drejtuar nga Kryeministri Ramush Haradinaj. "Pavarësia jeton në ne dhe me ne dhe për Pavarësinë të gjithë kemi rrëfimin tonë", tha ai, duke shprehur konsideratën dhe vlerësimin më të lartë për përvjetorin e shënimit të ngjarjes më të madhe të Kosovës dhe popullit të saj. "Në këtë ditë do të shprehim gjithë falënderimin tonë për të rënët për liri, për miqtë dhe të gjithë ata që ndihmuan rrugëtimin e Kosovës drejt realizimit të aspiratave për liri dhe pavarësi. Me kujdesin më të madh jemi përballur me të gjitha temat që i kanë dalë para Kosovës, para Qeverisë, dhe njëkohësisht me respektin më të madh për interesin e qytetarëve të vendit. Ka shumë vendime, shumë ligje, reforma, vendime të mëdha sikurse ishte ushtria, vendimet që lidhen me Trepçën, me resurset tjera ekonomike", tha Kryeministri Haradinaj në fjalën e tij para kabinetit qeveritar. Kryeministri Ramush Haradinaj, i shoqëruar nga kabineti qeveritar, ka vizituar kompleksin memorial "Adem Jashari" në Prekaz dhe ka bërë nderime të varrezat e të rënëve, duke rikujtuar se sakrifica dhe lufta e shenjtë e UÇK- së ishin themeli i Pavarësisë dhe lirisë së Kosovës.