Meta në Berlin, takim me Presidentin gjerman
Steinmeier jep mbështetjen për proceset integruese të Shqipërisë
Gjatë vizitës së tij në Berlin, Presidenti Meta u prit në një takim të veçantë nga Presidenti i Republikës Federale të Gjermanisë, FrankWalter Steinmeier.
Siç bën të ditur zyra e shtypit të Presidencës, gjatë takimit Meta vlerësoi marrëdhëniet e shkëlqyera midis dy vendeve dhe shprehu mirënjohjen e thellë për mbështetjen 30- vjeçare të Gjermanisë për zhvillimin e Shqipërisë dhe integrimin e saj në strukturat euroatlantike. “Presidenti Steinmeier e siguroi Presidentin Meta se Gjermania do të vazhdojë të jetë një partner i rëndësishëm dhe mbështetëse kryesore në proceset integruese për Shqipërinë dhe të gjitha vendet e rajonit, me synim jo vetëm ruajtjen e stabilitetit dhe paqes në Ballkan, por mbi të gjitha, për t’i ndihmuar ata në avancimin e reformave për një zhvillim ekonomik të qëndrueshëm, forcimin e shtetit ligjor dhe prosperitetin e popujve të rajonit”, theksohet në njoftimin e zyrës së shtypit të Presidencës. Mësohet se gjatë takimit u diskutua edhe për zhvillimet në rajonin e Ballkanit, ku Meta ka vlerësuar vëmendjen e madhe që Presidenti Steinmeier dhe Gjermania u kushtojnë marrëdhënieve me Shqipërinë dhe zhvillimeve në rajonin e Ballkanit Perëndimor. “Duke u ndalur te zhvillimet më të fundit në rajon, të dy presidentët ndanë të njëjtin vlerësim se arritja e Marrëveshjes së Prespës është një shembull i suksesshëm, që inkurajon edhe Kosovën, edhe Serbinë për normalizimin e marrëdhënieve dhe arritjen e një marrëveshjeje të qëndrueshme në interesin më të mirë të paqes, stabilitetit dhe integrimit europian. Në fund të takimit, Presidenti Meta e ftoi Presidentin Steinmeier për një vizitë zyrtare në Shqipëri, që u mirëprit me kënaqësi”, thuhet në njoftimin për shtyp.
KONFERENCA Gjatë vizitës së tij në Gjermani, Meta ishte i ftuar nderi në Konferencën vjetore të Ndërmarrjeve të Vogla dhe të Mesme gjermane. Gjatë këtij aktiviteti, kreu i shtetit shqiptar mbajti edhe një fjalë përshëndetëse, duke theksuar se Shqipëria ka si prioritet të saj anëtarësimin në BE. “Tashmë, Shqipëria është anëtare e NATO- s dhe vend kandidat për anëtarësimin në BE. Falë vizionit të Kancelares Merkel, të mishëruar edhe në procesin e Berlinit, të gjitha vendet e Ballkanit Perëndimor kanë një aspiratë dhe një destinacion të qartë drejt integrimit europian. Ne shpresojmë se edhe me mbështetjen e paçmuar të Gjermanisë dhe me vullnetin e të gjithë vendeve anëtare, të jemi të gatshëm të çelim negociatat me BE- në qershorin e 2019ës. Më lejoni të mbyll fjalën time duke shprehur bindjen se ne jemi të vetëdijshëm që sot Bashkimi Europian, sikurse dhe Gjermania si pjesë e rëndësishme e lidershipit të saj, ka sfida madhore për të adresuar dhe pikëpyetje ekzistenciale për të zgjidhur. Në këtë kontekst, unë besoj se të gjitha këto sfida kërkojnë një BE më të bashkuar, më të reformuar dhe më të hapur ndaj zgjerimit për Ballkanin Perëndimor, sepse një Ballkan në paqe dhe me stabilitet, me prosperitet dhe i integruar plotësisht në familjen europiane, është një garanci më shumë për një BE më të fortë në dimensionin politik, ekonomik, ushtarak dhe në atë të kohezionit social”, tha ndër të tjera Presidenti Meta.