Tarifat shtesë për mbetjet, aferë në landfillin e Sharrës
Bashkia e Tiranës ka pranuar kërkesat e koncesionarit
Kompani të ndryshme ndërtimi kanë kontraktuar kamionë për të hedhur mbetjet inerte në landfillin e Sharrës.
Ky është i vetmi vend në të gjithë Tiranën, ku lejohet hedhja e dherave apo materialeve që mbeten pas ndërtimeve. Kompanitë duhet të paguajnë një shumë prej 480 lekësh për ton apo rreth 100 euro për kamion. Pagesën duhet ta kryejnë edhe individë, të cilët kontraktojnë mjete të tonazhit të ulët apo të lartë për zhvendosjen e mbetjeve inerte pas kryerjeve të punimeve të ndryshme në ambiente private. Tarifa është vendosur nga kompania "Integrated Energy B. V", e cila prej vitit 2017 ka fituar për 30 vjet koncesionin e menaxhimit të mbetjeve të të gjithë kryeqytetit. "News24" ka arritur të mësojë se Bashkia e Tiranës është njoftuar dhe e ka pranuar propozimin e koncesionarit për të caktuar atë tarifë. Të gjitha këto fakte ngrenë dyshimet për një aferë në favor të vetë koncesionarit. Në bazë të kontratës së nënshkruar me Ministrinë e Mjedisit, kompania, e cila do të ndërtojë edhe in- ceneratorin, do të paguhet nga Bashkia e Tiranës me një shumë prej 29 eurosh për çdo ton mbetje organike që depozitohet në landfill, nga mjetet që merren me pastrimin e kryeqytetit.
Tani, përpos kësaj shume, individë apo kompani të ndryshme, të cilat e paguajnë një herë taksën e pastrimit, do të duhet të paguajnë një tarifë prej 480 lekësh për çdo ton mbetje të dërguar në Sharrë. Dhe nuk mbaron me kaq. Bashkia e Tiranës me anë të Policisë Bashkiake dhe Inspektoratit Mjedisor nuk i lejojnë kompanitë që të mund t'i depozitojnë mbetjet ndërtimore apo dherat në vende të tjera me një çmim më të ulët. Madje, as të mund t'i shesin ato për llogari të kompanive të tjera, që mund të kenë nevojë për dherat e përfituara nga hapja e gropave të ndërtimit. Penalitetet e përcaktuara nga autoritetet nuk bëjnë gjë tjetër vetëm se i drejtojnë mjetet për në Sharrë. Aty ku kompania koncesionare, e shndërruar tash- më në monopoliste, do të vjelë para të tjera, përpos shumës së madhe që i paguan çdo muaj bashkia e kryeqytetit. Ndërkohë që tarifat, sigurisht bien në kurriz të konsumatorëve.