Koka, kundër vendimit të LSI për lënie mandati
“Nuk është vendim i LSI, por i Saliut, s’më tërheq dot zvarrë”
Deputeti dhe ish- ministri i LSI- së, Lefter Koka, është deputeti i parë opozitar, që refuzon të djegë mandatin e deputetit. Mungesën e tij në mbledhjen e Grupit Parlamentar të LSI- së, ku edhe u mor vendimi për të djegur mandatet parlamentare, Koka e ka justifikuar me vendimmarrjen e tij për të mos lënë një mandat të dhënë nga qytetarët durrsakë. Ishministri i Mjedisit, përmes një reagimi për mediat, ka kujtuar se në karrierën e tij politike është udhëhequr vetëm nga interesi i qytetarëve për ushtrimin e detyrave dhe nga asgjë tjetër. “Opozita dje mori vendimin për të djegur mandatet e deputetit. Vendimi im i palëkundur është se unë nuk do të djeg mandatin e deputetit, që mijëra durrsakë më kanë besuar. I zgjedhur prej vullnetit të bashkëqytetarëve të mi për të ushtruar pushtetin legjislativ dhe të jem përfaqësuesi i tyre. Parimet e mia në 2 dekada te jetës sime politike janë udhëhequr vetëm nga interesi i qytetarëve. Janë ata që më kanë treguar gjithmonë cila është e drejta dhe e vërteta, janë ata bashkudhëtarët dhe udhërrëfyesit e mi”, ka deklaruar Koka. Sipas deputetit të LSI- së, vendimi për të djegur mandatet opozitare nuk është i forcës së tij politike, por i ishKryeministrit Berisha. Koka akuzoi Berishën për deklarata të turpshme, duke kujtuar qëndrimin e tij në Grupin e PD- së për plumb ballit ndaj Kryeministrit Rama. “Ky nuk është një vendim thjesht i Lëvizjes Socialiste për Integrim, por i Saliut, i cili në shekullin 21 bën thirrje për plumba ballit. Dhe nëse erdhi dita që ai të tërheqë zvarrë LSI- në, a thua se LSI është Luli, nuk mund të më tërheqë zvarrë mua drejt aventurave që unë i gjykoj të turpshme për shoqërinë shqiptare dhe demokracinë”, theksoi ish- ministri. Deputeti i LSI- së garanton se mandati i tij nuk do të përdoret për t’u vënë flakën institucioneve dhe Parlamentit shqiptar. Koka shpreh mirënjohjen e tij për besimin e dhënë nga qytetarët durrsakë. “Mandati im është besimi i mijëra qytetarëve. Është mandati i qytetarisë, kulturës dhe fisnikërisë durrsake, që as në ditët më të vështira të këtij qyteti nuk theu kurrë një xham. Qytetarët durrsakë kanë treguar në çdo kohë se ata janë shembulli më i mirë i shoqërisë shqiptare. Mandati im nuk mund të përdoret assesi për t’u vënë flakën institucioneve shtetërore apo Parlamentit shqiptar. Thellësisht mirënjohës për të përfaqësuar sa më denjësisht zërin tuaj!”, tha Koka.