Tabaku: Vëllai i Spiropalit, 550 milionë lekë tenderë
Reagon ministrja: Akuza të pavërteta, shihemi në gjyq
Partia Demokratike akuzoi dje ministren e Shtetit, Elisa Spiropali, se vëllai i saj ka përfituar 550 milionë lekë tendera të dhëna nga bashkëshorti i vetë ministres. Nëpërmjet një deklarate për mediat nga selia blu, deputetja Jorida Tabaku dhe kryetarja e Departamentit Antikorrupsion në PD, Lealba Pelinku, publikuan dokumentet ku faktoheshin transaksionet. Tabaku, në fjalën e saj, theksoi se: “Këto janë afera të pastra korruptive, që meritojnë ndjekje penale dhe përballje me drejtësinë. Më e pakta që duhet të ndodhë sot, është angazhimi i menjëhershëm i Inspektoratit të Pasurive për të hapur një hetim pasurisë për Elisa Spiropalin. Nëse do të ndjekin paratë, do të zbulojnë ndoshta edhe skema të tjera korrupsioni dhe konflikti interesi të zëdhënëses së Edi Ramës”. Kryetarja e Departamentit Antikorrupsion në PD, Lealba Pelinku, detajoi transaksionet e bëra, duke theksuar se: “Për të përfituar 550 milionë lekë pa rënë në sy, familja e Elisa Spiropalit ndoqi një skemë djallëzore. Pronar u regjistrua i vëllai, tenderin e parë e mori vëllai i drejtoreshës së Doganave nga kunati, drejtori i Ujësjellësit Fier, pastaj kompania u shit te kushëriri i bashkëshortit të Elisës. 550 milionë lekët janë marrë me tendera të vogla, që nuk tërheqin vëmendjen. Me tendera 6- 7 milionësh, bashkëshorti i Elisa Spiropali i ka dhënë kompanisë së krijuar nga kunati i tij, vëllai i Elisës, rreth 350 milionë lekë”. Pas deklaratës së PD- së, reagoi Elisa Spiropali, e cila nëpërmjet një statusi në “Fa- cebook”, theksoi se vëllai i saj nuk ka përfituar asnjëherë nga paratë publike dhe se denoncimin e bërë nga PD do ta padisë në Gjykatë. “Vëllai im nuk ka përfituar kurrë dhe asnjëherë asnjë kontratë apo fond publik, as kur isha beqare, as kur u martova, as kur isha aktiviste, as kur isha drejtore e as tani si ministre. Padia është e vetmja rrugë me këta bartës e përçues të horrllëkut politik. Në Gjykatë le të provojnë çfarë akuzojnë ose përndryshe paratë për dëmin do të shkojnë për të ndihmuar kopshtin e Kolonjës”, u shpreh Spiropali.