Probleme me pasurinë, shkarkohet kreu i Prokurorisë së Apelit Korçë
Komisioni i Pavarur i Kualifikimit shkarkoi dje nga detyra drejtuesen e Prokurorisë së Apelit Korçë, Irma Balli, ndërsa në seancën dëgjimore ngriti dyshime për pasurinë e saj. Vendimi për Ballin do të jepej një javë më parë, por Komisioni e shtyu datën e vendimit, që u dha dje. Sipas Komisionit, problem është bërë një biznes privat në Korçë në bashkëpronësi me persona të tjerë, ku u ngritën pikëpyetje në lidhje me vlerën e investimit fillestar, apartamenti i bashkëshortit dhe dyshime se nga kontrata e qiradhënies nuk janë paguar tatimet në disa raste. Sipas relacionit, hetim i thelluar ishte kryer mbi karburantin, ku për vlerën e investimit fillestar për ndërtimin e tij, prokurorja ka deklaruar se ka kontribuuar me 1 milion lekë nga kursimet dhe të ardhurat nga puna e bashkëshortit si emigrant në Greqi. Investimi nga babai dhe vëllai ka qenë 3 milionë e 500 mijë lekë. Babai ka pasur të ardhura nga i ati i tij, i cili ka qenë emigrant në Shtetet e Bashkuara të Amerikës, ku edhe ka ndërruar jetë. Ndërsa vëllai kishte kursime nga puna si emigrant në Greqi. Ndërkohë, bashkëpronarja tjetër, motra e subjektit, ka kontribuuar me 1 milion lekë. Sipas KPK- së, prokurorja dhe personat e lidhur me të, bashkëpronarët e tjerë, nuk arrijnë të justifikojnë me mjete ligjore të ardhurat e deklaruara për investimin në këtë karburant. Gjatë seancës dëgjimore u ngritën dyshime edhe për mospagim të taksave, gjë që Balli e kundërshtoi. “Mbi të ardhurat dhe detyrimet tatimore për dhënien me qira të karburantit, sqarojmë si më poshtë: përmbushja e kontratës së qirasë me shoqërinë K. D., sipas dokumentacionit të administruar nga bankat e nivelit të dytë, rezulton se pagesat e qirasë së muajit shtator 2011 në shumën 350 mijë lekë pagesë, është derdhur bruto, pa u mbajtur tatimi në burim. Pagesa e qirasë për muajt maj- qershor 2013, e cila është depozituar në bankë në gusht 2013 është derdhur bruto pa u mbajtur tatimi në burim”, tha relatori.