Reforma në inspektorate, si do të riorganizohen 29 struktura e drejtori
Drafti i reformës: Do krijohen 6 megainspektorate. Arkiva e Shtetit dhe 14 drejtori do të përfshihen në Inspektorat
Qeveria ka gati reformën për riorganizimin e inspektorateve. Reforma synon krijimin e 6 megainspektorateve, ku në secilin prej tyre do të përfshihen 15 inspektoratet aktuale dhe 14 drejtori dhe agjenci.
Pavarësisht se këto 14 drejtori kryejnë funksione kontrolluese, ato nuk janë në varësi të Inspektoratit Qendror. Projektligji “Për inspektimin në Republikën e Shqipërisë, tashmë i hedhur për konsultim, synon krijimin e 6 inspektorateve të mëdha, ku do të përfshihen 15 inspektoratet ekzistuese dhe 14 drejtori dhe agjenci. Ndryshimet janë propozuar nga inspektori i përgjithshëm, Shkëlqim Hajdari, ku në relacionin e draftit shpjegohet edhe shkaku i ndryshimeve. “Nisur nga mbikëqyrja e veprimtarisë inspektuese të inspektorateve shtetërore, është konstatuar se ka mbivendosje të disa funksioneve inspektuese midis inspektorateve të ndryshme, të cilat inspektojnë në mënyrë të pavarur për të njëjtën fushë inspektimi, duke rënduar biznesin dhe rritur kostot e tepërta financiare të buxhetit të shtetit”, thuhet në draft.
REFORMA Rreth 15 inspektorate të organizuara në inspektorate shtetërore dhe vendore funksionojnë në vend të ndara sipas fushave dhe ministrive të linjës. Sipas qeverisë, kjo ndarje ka sjellë mbivendosje të funksioneve, rëndon kostot e buxhetit, por edhe biznesin. Reforma e re do të sjellë krijimin e 6 megainspektorateve, ku brenda tyre do të përfshihen disa njësi, sipas fushës së kontrollit dhe ministrisë që përfaqësojnë. Referuar draftit, në Inspektoratin e Shëndetësisë dhe Ushqimit, që do të jetë përgjegjës për kontrollin e sigurimit të shërbimeve të kujdesit shëndetësor dhe zinxhirit ushqimor do të përfshihen: Autoriteti Kombëtar i Ushqimit; Inspektorati Shtetëror Shëndetësor; Agjencia Kombëtare e Barnave dhe Pajisjeve Mjekësore; Drejtoria e Shërbimit të Peshkimit dhe Akuakulturës; Drejtoria e Shërbimit Veterinar; Zyra për Mbrojtjen nga Rrezatimet; Fondi i sigurimit të detyrueshëm të kujdesit shëndetësor; Inspektorati i Mbrojtjes së Tokës. Në Inspektoratin Shtetëror të Mjedisit dhe Territorit do të bashkohen institucionet me struktura inspektuese si: Inspektorati Shtetëror i Mjedisit, Pyjeve, Ujërave dhe Turizmit; Inspektorati Kombëtar i Mbrojtjes së Territorit; Agjencia Kombëtar e Zonave të Mbrojtura; Inspektorati Kombëtar për Mbrojtjen e Trashëgimisë Kulturore. Ky megainspektorat do të jetë përgjegjës për mbrojtjen e mjedisit, pyjeve dhe zonave bregdetare. Inspektorati Shtetëror i Teknikës dhe Teknologjisë do të kontrollojë tregun e produkteve joushqimore. Pjesë në këtë inspektorat do të jenë: Inspektorati Shtetëror Teknik dhe Industrial; Autoriteti Kombëtar për Sigurinë dhe Emergjencën në Miniera; Autoriteti i Kontrol- lit Shtetëror të Eksporteve; Agjencia Kombëtare e Burimeve Natyrore. Në Inspektoratin Shtetëror të Transportit dhe Infrastrukturës, si inspektorat që do të kontrollojë sektorin e infrastrukturës dhe transportit rrugor, detar, hekurudhor dhe të aviacionit do të përfshihen: Drejtoria e Përgjithshme e Shërbimeve të Transportit Rrugor; Autoriteti i Aviacionit Civil; Drejtoria e Përgjithshme Detare; Drejtoria e Inspektimit të Hekurudhave. Inspektorati Teknik i Digave dhe Dambave. Në Inspektoratin Shtetëror të Ekonomisë, pjesë e tij do të jenë: Inspektorati Shtetëror i Mbikëqyrjes së Tregut; Drejtoria e Hetimit Tatimor; Drejtoria e Hetimit Doganor. Në Inspektoratin Shtetëror të Punës, që kontrollon zbatimin e ligjit te punëdhënësi dhe punëmarrësi do të përf- shihen: Inspektorati Shtetëror i Punës dhe Shërbimeve Shoqërore; Instituti i Sigurimeve Shoqërore; Instituti i Sigurimeve Shëndetësore; Inspektorati Shtetëror i Arsimit dhe Drejtoria e Përgjithshme e Arkivave.