Daçiç: Zgjidhja me Kosovën vjen nga ndryshimi i kufijve
Përgjigjet Haradinaj: Ndarja në vija etnike sjell tragjedi
Ideja e ndryshimit të kufijve është shpallur të martën si propozimi zyrtar i Serbisë për të zgjidhur mosmarrëveshjet me Kosovën.
Deklarata u bë nga zëvendëskryeministri dhe ministri i Jashtëm i Serbisë, Ivica Daçiç, i cili ka thënë se propozimi zyrtar i Serbisë për zgjidhjen e çështjes së Kosovës, është “ndarja e kufirit mes serbëve dhe shqiptarëve”. Në një takim për të ardhmen e Europës dhe Ballkanit të mbajtur në Beograd, Daçiç, duke iu përgjigjur pyetjes së “Evropa e Lirë”, tha: “Nëse kjo ide do të jetë në tryezë të bisedimeve, atëherë të dyja palët do të deklarohen për të”. Sipas tij, çështja se ku do të përcaktohej linja e ndarjes së kufirit ende nuk është vendosur. Daçiç tha se lidhur me këtë çështje, nëse propozimi pranohet, zgjidhja do të jepet në dialogun midis Beogradit dhe Prishtinës në Bruksel. Çështja e ndryshimit të kufirit mes Kosovës dhe Serbisë është përmendur disa herë edhe nga Presidenti i Kosovës, Hashim Thaçi, i cili e quan këtë proces “korrigjim i kufijve”. Edhe Presidenti i Serbisë, Aleksandër Vuçiç, nuk e ka përjashtuar këtë ide si kompromis për të arritur një marrëveshjeje gjithëpërfshirëse mes Kosovës dhe Serbisë. Perëndimi është i ndarë për këtë ide, me shumë e që e kundërshtojnë fort si të rrezikshme dhe të tjerë që presin të shohin rezultatin e “eksperimentit”. SHBA- ja ka thënë se do të pranojë çdo marrëveshje, për të cilën pajtohen të dyja palët. Institucionet e BE- së kanë deklaruar se përkrahin arritjen e mar- rëveshjes, për të cilën pajtohen Prishtina dhe Beogradi. Ndërsa Gjermania po e kundërshton ndryshimin e kufijve si pjesë të marrëveshjes. Arritjen e shpejtë të një marrëveshjeje dhe festimin e saj në Shtëpinë e Bardhë e ka kërkuar edhe Presidenti i Shteteve të Bashkuara, Donald Trump, përmes një letre që ua ka dërguar kohë më parë Presidentëve Thaçi dhe Vuçiç. Ndërkohë, Kryeministri Ramush Haradinaj e ka përsëritur qëndrimin e tij kundër ndryshimit të kufijve, ndërsa e quan të palogjikshme ndarjen në vija etnike. Në konferencën për media pas mbledhjes së Qeverisë, Haradinaj iu përgjigj kërkesës publike të kryediplomatit serb, Ivica Daçiç, që serbët dhe shqiptarët të ndajnë kufijtë sipas etnisë. Haradinaj tha se është e pakuptueshme dhe e palogjikshme që shtetet të ndahen me baza etnike dhe kjo sipas tij, do të sillte tragjedi. “Qëndrimi i Daçiçit nuk është i ri. E ka pas në vazhdimësi, e ka konfirmuar edhe një herë se është qëndrim zyrtar i Serbisë ndarja etnike. Ndarja etnike ka krijuar tragjedi në Ballkan. Janë me rrezik këto deklarime. Ndarja me vija etnike është e pamundur dhe e pakuptimtë në nivel politik”, tha Haradinaj.