“Alergji” nga goli, dominojnë Barça dhe Liverpuli
Ronaldo dhe Juve sfidojnë Atletikon në stadiumin e finales së Champions- it
Spektakël, emocione, por pa gola. Dy sfidat e fazës së 1/ 8- ave nuk regjistruan asnjë rrjetë të prekur dhe asnjë finalizim për të ndryshuar rezultatin.
Liverpul prodhon shumë, por pa rezultat ndaj Bajernit. Njësoj si edhe Barcelona, por Lioni ruan rezultatin e bardhë.
LIVERPUL- BAJERN
"Të kuqtë" nisën vrullshëm. Të besuarit e Jurgen Klop nisën të diktojnë ritmin përballë Bajernit, por me kalimin e minutave regjistroheshin vetëm aksione shumë të shpejta deri në zonë, më tej mbrojtësit largonin ose finalizimi nuk ishte i saktë. Mungesa e dy qendërmbrojtësve diktoi shumë në lojën e Liverpulit, që nuk kishte organizimin e duhur dhe vështirësia hasej që nga portieri Alison në nisjen e sferës dhe më tej të filtrimit të topit në mesfushë. Skuadra tregon kujdes në prapavijë dhe loja është agresive, por e rrëmujshme, sidomos në mesfushë. Mane dhe Salah janë shumë të shpejtë për bavarezët, por në fund, porta e Nojer ka shumë pak raste të pastra shënimi në kuadrat. Mjaft të përmendet që në fund të 90 minutave, skuadrat e mbyllën me shifrat 2- 1 të goditjeve brenda kuadratit.
LION- BARCELONA
Tjetër tablo në Francë. Barcelona dominon në çdo aspekt, qarkullim topi, raste të krijuara për gol, tentativa në kuadrat dhe gjithçka tjetër, por katalanasit nuk ia dolën të ndryshojnë statistikën më të rëndësishme: Golat. Edhe në Lion, sfida e parë e 1/ 8- ave ka përfunduar "thatë". 25 gjuajtjet e Barcelonës ishin shterpë, duke lënë gjithçka të hapur në sfidën e kthimit në "Kamp Nou".
ATLETIKO- JUVENTUS
Juventus dhe Ronaldo do të sfidojnë Atletikon e Antuan Grizman në rrugën drejt finales. Është pikërisht impianti në të cilin do të luhet finalja, që mirëpret sot supersfidën e radhës të kësaj faze në Ligën e kampionëve. Paulo Dibala është në kërkim të finales së tij të dytë të Ligës së Kampioneve, por këtë herë jo vetëm që kërkon të arrijë, por edhe ta fitojë atë. Stadiumin e finales do ta shijojë sot kundër Atletikos, por ai dhe Juventusi do të shkelin aty vetëm për 1/ 8- at, me shpresën se do të jenë sërish protagonistë në "Vanda Metropolitano" edhe më 1 qershor. Gjithsesi, sulmuesi bardhezi nuk është aspak i trembur në pritje të ndeshjes së vajtjes me spanjollët, pasi sivjet Juventusi ka edhe një Kristiano Ronaldo më shumë në skuadër. Portugezi është "makth" në këtë stadium dhe në përgjithësi për Atletikon, pasi arrin të shënojë rregullisht duke e shndërruar skuadrën madrilene në "prenë e preferuar". Nga ana tjetër, "El Çolo" Simeone do të instruktojë të tijtë si të kishin një derbi, duke ditur që përballë do të kenë ish- yllin e Real Madridit.