Grabitja në Rinas, 10 mijë euro për tre të kërkuarit
Klement Çala, Eldi Çala e Talo Çela, ende në arrati
Grabitja e 6 milionë eurove në Aeroportin e Rinasit më 9 prill pati si autorë të dyshuar të paktën 11 persona, nga të cilët një i vrarë, 7 të arrestuar dhe 3 të tjerë që vazhdojnë të jenë në kërkim.
Për kapjen e tre të kërkuarve, vëllezërve Klement e Eldi Çala, si dhe të Talo Çelës, Policia ka kërkuar dje ndihmën e qytetarëve, duke ofruar një shpërblim prej 10 mijë eurosh për informacionin e saktë. Ndërsa garanton në çdo rast ruajtjen e anonimatit. Këta tre persona dyshohet të kenë rolin e organizatorit në supergrabitjen ku mbeti i vrarë Admir Murataj, i konsideruar si kreu i grupit të strukturuar kriminal. Policia tha dje se në vijim të punës për zbardhjen dhe dokumentimin e plotë të ngjarjes së ndodhur më datë 9 prill 2019, si rezultat i punë së bërë nga grupi i posaçëm hetimor, deri tani janë ndaluar 7 persona, si dhe janë sekuestruar sasi të konsiderueshme vlerash monetare dhe sende që lidhin autorët me veprën penale. E po në vijim të kësaj pune, falë veprimeve hetimore të kryera, Gjykata për Krimet e Rënda ka caktuar në mungesë masën e sigurisë "Arrest në burg", për veprat penale "Vrasja e punonjësit të Policisë", kryer në bashkëpunim, mbetur në tentativë, "Vjedhja me armë kryer në bashkëpunim" dhe "Grup i strukturuar kriminal", për tre shtetasit: Klement Çala, 31 vjeç, Eldi Çala, 34 vjeç dhe Talo Çela, 48 vjeç, banues në Elbasan. "Të tre këta shtetas janë shpallur në kërkim nga Policia dhe vijon puna për identifikimin e vendndodhjes dhe kapjen e tyre. Policia e Shtetit për çdo informacion të vlefshëm që do të çonte në gjetjen dhe kapjen e këtyre personave, ka vënë në dispozicion shumën prej 10 mijë eurosh. Cilido qytetar që disponon informacion të vlefshëm, të telefonojë në numrat: 069 41 04 111 dhe 069 41 00 615, duke iu garantuar anonimat të plotë e të sigurt. Vijon puna për identifikimin e personave të tjerë, të përfshirë në këtë ngjarje kriminale", tha dje zyrtarisht Policia. Personi i fundit që u arrestua për grabitjen e 6 milionë eurove në Rinas, ishte Hasan Kanaçi, punonjës i kargos, i cili u la në burg nga Gjykata. Ndërsa së fundmi, Policia tha se kishte sekuestruar rreth 1.5 milionë euro pasuri në emër të Admir Muratajt dhe familjarëve të tij. Pa u mbushur dy javë nga supergrabitja në pistën e avionëve në Rinas, Policia ka kryer ndalimet e para mesditën e 21 prillit. Katër persona u vunë në pranga gjatë një operacioni që nisi në mbrëmje. Pas dëshmisë së të penduarit Alkond Bengasi, të cilit iu gjetën gjurmët e gishtave në furgonin, me të cilin u realizua grabitja, Policia arriti të arrestojë disa nga personat e dyshuar si autorë të kësaj ngjarje. Ndërsa 3 të tjerët, që sipas grupit hetimor dyshohet se kanë pasur rol aktiv në grabitje, vijojnë të jenë në kërkim.