PD: Të dhënat e KQZ janë mashtrim, në votime 15 për qind e shqiptarëve
Publikimi i rezultatit final për pjesëmarrjen në votimet e 30 qershorit solli edhe reagimin e Partisë Demokratike. Nëpërmjet Sekretarit për Çështjet Zgjedhore, Ivi Kaso, Partia Demokratike akuzoi qeverinë se ka manipuluar një proces zgjedhor, ku ka garuar e vetme. “Edi Rama ka thyer çdo rekord në historinë e manipulimit të zgjedhjeve. Nevoja për të mbuluar refuzimin masiv të shqiptarëve e ka çuar të manipulojë rëndë edhe votimet e veta me 1 kandidat. Në krye të këtij operacioni kriminal qëndron Komisioni Qendror i Vjedhjeve. Të dhënat e sotme janë mashtrim. Komisionerët socialistë, në bashkëpunim me Komisionin Qendror të Vjedhjeve, kanë rritur pjesëmarrjen me 8 për qind, që do të thotë se kanë mbushur kutitë, duke shtuar rreth 280 mijë vota në të gjithë vendin. Ata nuk kanë ruajtur dot as shifrën zyrtare të dhënë nga vetë Komisioni natën e 30 qershorit. Pjesëmarrja reale në votimet e paligjshme dhe antikushtetuese të 30 qershorit është 15 për qind. Mbushja e kutive për t’i dhënë Edi Ramës oksigjen nuk e ndryshon dot faktin se shqiptarët panë se gjatë gjithë ditës, veçanërisht pas mesditës, qendrat e votimit në të gjithë vendin ishin pothuajse bosh. Komisioni Qendror i Vjedhjeve mashtroi gjatë gjithë ditës së diel për numrin e pjesëmarrësve në votime. Akoma sot, ky organ që nuk u shërben zgjedhjeve, por vjedhjes së Edi Rmës, nuk ka dhënë llogari pse në deklaratën e së dielës për pjesëmarrjen në orën 11: 00, shifra u dyfishua në 12 për qind, kur, në të vërtetë, sipas dokumentit që publikoi Partia Demokratike, shifra reale ishte vetëm 6 për qind”, theksoi Kaso. Në vijim të deklaratës së tij, ai e konsideroi të paprecedent mungesën e transparencës nga ana e KQZsë. “Siç kemi denoncuar më herët, për të manipuluar rezultatin e 30 qershorit, Komisioni Qendror i Vjedhjeve zhduku transparencën nëpërmjet dy mekanizmave. Më 30 qershor, të dhënat e pjesëmarrjes nuk u hodhën në sistemin online të të dhënave për të mos lënë gjurmë. Gjatë gjithë procesit të numërimit nuk u publikua asnjë tabelë me rezultatet. Është e paprecedent që në fund të procesit të numërimit, edhe tani që flasim, Komisioni Qendror i Vjedhjeve nuk ka publikuar asnjë të dhënë për qendrat e votimit për asnjë bashki”, deklaroi Kaso.