PD nuk njeh zgjedhjet e 30 qershorit, Basha: Janë nul, ftoj shqiptarët në protestë
Mesazhi për ndërkombëtarët: Ndëshkimi i politikanëve që kanë vjedhur zgjedhjet s’mund të diskutohet apo negociohet në tavolina politike
Partia Demokratike ka vendosur të mos presë raportin përfundimtar të vëzhguesve të OSBE/ ODIHR për të deklaruar se nuk i njeh zgjedhjet vendore të 30 qershorit.
Raporti paraprak dhe gjetjet e prezantuara nga drejtuesja e misionit të vëzhguesve të OSBE/ ODIHR- it, Audrey Glover, janë të mjaftueshme për demokratët për të mos e njohur një proces zgjedhor që u zhvillua pa pjesëmarrjen e opozitës. Kryetari i PD- së, Lulzim Basha, deklaroi se 30 qershori ishte jo vetëm një proces antikushtetues, por edhe antidemokratik, që ka një kosto të lartë politike e shoqërore për shqiptarët. Basha hodhi poshtë edhe qëndrimin e shumë prej ndërkombëtarëve dhe eksponentëve të shumicës, të cilët kanë sugjeruar që kryebashkiakët të fillojnë punën dhe më pas çështja të shqyrtohet nga Gjykata Kushtetuese. “Qëndrimi që ta uzurpojë pushtetin vendor Edi Rama në mënyrë antikushtetuese dhe të paligjshme, se pas ca muajsh do krijojmë Gjykatën Kushtetuese dhe pastaj gjykon ajo me prapaveprim, bie ndesh me parimet e shtetit të së drejtës dhe me parimet bazë të demokracisë. 30 qershori ishte jo vetëm veprim antikushtetues dhe antidemokratik, por edhe një veprim me kosto politike e shoqërore që dëmton direkt interesat e qytetarëve. Votimet e 30 qershorit, përtej një farse antiligjore, u manipuluan me çdo mjet dhe mënyrë, që nga manipulimet ligjore dhe kërcënimet e votuesve te manipulimi i votimit dhe numërimit. Opozita nuk i njeh votimet e 30 qershorit dhe nuk ka për t’i njohur. Këtë gjë e vendosën vetë shqiptarët më 30 qershor, në shumicë dërrmuese”, tha Basha. NDËRKOMBËTARËT Thirrjeve për dialog të ambasadorit të BE- së në Tiranë, Luigi Soreca, kryedemokrati Basha iu përgjigj duke kujtuar se për opozitën ndëshkimi i vjedhësve të zgjedhjeve dhe është e vetmja rrugë për zgjidhjen e krizës politike. “Çdokush që pranon në heshtje apo pajtohet me vetëdije me këtë shkatërrim të Kushtetutës dhe të institucionit themelor të demokracisë, zgjedhjeve të lira, nuk i shërben as demokracisë dhe as interesit të shqiptarëve. Kriza politike në Shqipëri nuk mund të zgjidhet me pandëshkueshmëri, duke i bërë lëshime apo duke falur krimet, vjedhjet dhe shkeljet e ligjit. E vetmja rrugë drejt politikës normale dhe demokratike është ajo e sundimit të ligjit, që do të thotë, mbi të gjitha, një gjë: ndëshkim të politikanëve që kanë vjedhur zgjedhjet dhe kanë bashkëpunuar me krimin. Ndëshkimi i politikanëve që kanë vjedhur zgjedhjet në bashkëpunim me krimin dhe sundimi i ligjit nuk mund të diskutohen apo negociohen në tavolina politike”, sqaroi kreu i PD- së.
PROTESTA Opozita ke vendosur t’u kthehet protestave kombëtare. Pas takimeve me kryebashkiakët e djathtë dhe Kolegjin e Kryetarëve, kreu i PD- së, Lulzim Basha, njoftoi se shqiptarët do të jenë sërish në shesh të hënën e datës 8 korrik në orën 20: 00. “Dua të falënderoj nga zemra edhe një herë mbi 85 për qind të shqiptarëve që refuzuan diktaturën, farsën e Edi Ramës me 30 qershor. Dua \ ti ftoj të gjithë këta qytetarë dinjitozë të Shqipërisë europiane, nëna e baballarë, të rinj e të reja, prindër e bijë nënash shqiptarë, të na bashkohen ditën e hënë, në orën 20: 00, në një protestë të madhe kombëtare për të qëndruar të bashkuar me mirënjohje të thellë, me besim te vetvetja dhe te njëri- tjetri dhe për të vazhduar të vendosur, pa asnjë hap pas betejën tonë për çmontimin e diktaturës”, theksoi kreu i PD- së. Kjo do të jetë protesta e 10- të kombëtare e organizuar nga opozita që nga ajo e 16 shkurtit.