Kryebashkiakët e PD nuk do lirojnë zyrat, Kapllanaj: Do na sjellin Forcat Speciale
Kryebashkiakët e bashkive të drejtuara nga të zgjedhur të Partisë Demokratike kanë vendosur të mos lirojnë zyrat e tyre për të zgjedhurit në procesin e 30 qershorit. Pas takimeve intensive me kreun e PD- së, Lulzim Basha, në 48 orët e fundit, demokratët në krye të pushtetit vendor vendosën të mos lirojnë zyrat e tyre. Pas mbledhjes së dytë me kreun e PD- së, Lulzim Basha, kryebashkiakët theksuan se nuk do të lirojnë zyrat e tyre. “Panorama” kontaktoi me kryebashkiakun e Mallakastrës, Agron Kapllanaj, në lidhje me këtë vendimmarrje. Sipas kryebashkiakut në detyrë të Mallakastrës, vendimmarrja është për të mos u hapur rrugë të zgjedhurve ilegjitimë dhe të dalë nga një proces farsë. “Ka një vendimmarrje nga ne kryetarët e bashkive të zgjedhur nën logon e PD- së, por edhe të konsultuar dhe dakordësuar me kryetarin e partisë për të mos e njohur procesin zgjedhor të 30 qershorit. Ky është një proces që ne e kemi kundërshtuar, kontestuar dhe nuk kemi pranuar t’i vendosin në dispozicion edhe ambientet që janë nën administrimin e bashkive tona për zhvillimin e procesit. Kjo ka ardhur sepse ne nuk e njohim datën 30 qershor dhe nuk u bëmë pjesë e asaj farse. Kishte një dekret të Presidentit për anulimin e asaj date dhe një dekret të ri për datën 13 tetor. Ne njohim këtë datë dhe në këtë datë presim të zhvillohen zgjedhjet. Dhe vendimi ynë për të mos liruar zyrat lidhet me këtë gjë. Ne do të jemi në krye të detyrës deri ditën që do të zhvillohen zgjedhjet”, sqaroi Kapllaj për “Panorama”. Lidhur me mënyrën sesi do t’i mbrojnë zyrat e tyre, kryebashkiaku i Mallakastrës sqaron se nuk do të ketë një luftë me Policinë, por vendosmëria e të zgjedhurve vendorë është të mos u hapet rrugë njerëzve të paligjshëm. “Ne do të mbrojmë Kushtetutën e Shqipërisë dhe do t’u shërbejmë qytetarëve. Kuptohet nëse qeveria ka ndërmend të heqë të zgjedhurit vendorë me forca speciale të Sandër Lleshit, atëherë është në dorën e tij. Por ne nuk dalim nga zyrat për t’u lënë vendin kryetarëve ilegjitimë të dalë nga një proces farsë”, sqaroi Kapllanaj. Edhe kryebashkiaku i Kamzës i qëndroi bindjes së tij për të mos u tërhequr nga vendimmarrja për të mos liruar zyrën e bashkisë. “Vendimi është marrë më datë 30, që ishte i paligjshëm, e tregoi dhe pjesëmarrja. Asnjë lloj shansi nuk ka për të lënë një farsë elektorale. Nuk ka lidhje Lulzim Basha. Ne interpretojmë ligjin dhe kemi lexuar votat popullore. Ky është mendimi i shumicës së shqiptarëve, 85%”, theksoi Mziu.