KE rrëzon Holandën, vendim pro Shqipërisë
Komisioni Europian rrëzoi kërkesën e qeverisë holandeze për rivendosjen e sistemit të vizave për Shqipërinë. Qeveria e Holandës në datën 31 maj dorëzoi zyrtarisht në Komisionin Europian kërkesën e saj për rivendosjen e sistemit të vizave për Shqipërinë. Qeveria holandeze i dërgoi një letër eurokomisionerit për Migracionin, Çështjet e Brendshme dhe Shtetësinë, Dimitri Avramopoulos ku kishte paraqitur edhe argumentet për këtë kërkesë që përmblidhen në tri pika. Afati për shqyrtimin e kësaj kërkese ishte një muaj dhe përfundoi ditën e djeshme. Për këtë çështje, Komisioni Europian reagoi dje, nëpërmjet një zëdhënësi, ku theksoi se: “Pas një vlerësimi të kujdesshëm të përmbajtjes së njoftimit të marrë nga Holanda dhe bazuar në informacionin në dispozicion dhe të dhënat përkatëse, Komisioni konsideron se në situatën aktuale rrethanat për të nxitur mekanizmin e pezullimit të vizave nuk plotësohen. Komisioni do të vazhdojë të monitorojë nga afër përmbushjen e standardeve të liberalizimit të vizave për Shqipërinë, si dhe për vendet e tjera që përfitojnë nga udhëtimi pa viza”. Ky vendim i Holandës solli mjaft përplasje në Tiranë në sferën politike. Teksa maxhoranca shprehej se nisma është marrë nga deputetë që kanë qenë gjithmonë kundër integrimit, opozita e ka parë si rezultat i nivelit të ulët të luftës kundër krimit, korrupsionit dhe trafikut të drogës. Vetëm dy javë pas dorëzimit zyrtar të kërkesës së Holandës në Komisionin Europian, Parlamenti holandez miratoi dhe qëndrimin zyrtar për çeljen e negociatave për Shqipërinë, duke bërë të ditur se janë kundër hapjes së tyre. Nëse kërkesa e Holandës do të miratohej, atëherë pezullimi i lëvizjes së lirë do të bëhej për një afat prej 9 muajsh dhe gjatë kësaj periudhe Komisioni do të krijonte një dialog të zgjeruar me shtetin e tretë në fjalë, me qëllim që të korrigjojë rrethanat në fjalë. Ky vendim i Komisionit Europian për mosrikthimin e sistemit të vizave solli edhe reagimin e kreut të qeverisë shqiptare. Nëpërmjet një postimi në rrjetet sociale, Rama theksoi se këtë vendim të Komisionit e kishte paralajmëruar kohë më parë. “Ja dhe vizat s’u rikthyen, siç predikuan e trumpetuan lajmësit e qametit, që s’ndodhi! Komisioni Europian e refuzoi kërkesën e qeverisë holandeze dhe e vërteta doli fiks siç ishte kur e thamë e shumëkush s’e besoi: Vizat nuk rikthehen sepse Shqipëria s’ka shkelur asnjë kriter”, theksoi Kryeministri në reagimin e tij.