Mbi 510 mijë euro vjedhje kompanisë celulare, arrestohet i kërkuari
Policia e Tiranës ka arrestuar dje një 29- vjeçar, i cili ishte shpallur në kërkim që prej muajit shkurt, bashkë me 5 të tjerë, për "Vjedhje duke shpërdoruar detyrën". I arrestuari është shtetasi me iniciale F. P., banues në Berat, dhe është arrestuar në vijim të operacionit të koduar "Centralisti", që u zhvillua më 27 shkurt të këtij viti, gjatë të cilit u arrestuan 9 persona. Policia tha në atë kohë se të paktën 20 punonjës të një kompanie call center në Tiranë, dyshohej të ishin përfshirë në një vjedhje që kapte shifrat e 510 mijë eurove. Policia e kryeqytetit arrestoi 9 prej tyre, 5 i procedoi në gjendje të lirë, ndërsa 6 të tjerë i shpalli në kërkim, duke arrestuar dje njërin prej tyre. Akuza e ngritur ndaj tyre nga oficerët e Antikrimit Ekonomik dhe Prokuroria e Tiranës është ajo e "Vjedhjes duke shpërdoruar detyrën". Ndërsa mësohet se hetimi kishte nisur prej afro 8 muajsh nga ana e Seksionit për Hetimin e Krimit Ekonomik dhe Financiar në Policinë e Tiranës. Burime zyrtare të Policisë thanë dje se dëmi i konsiderueshëm financiar i është shkaktuar një kompanie të telefonisë celulare, që ndodhet jashtë vendit. Ndërsa punonjësit e përfshirë në këtë vjedhje dyshohet se kanë përfituar vlera të ndryshme parash, në ndonjë rast edhe 70 mijë euro nga një person, duke kryer rimbushje dhe aktivizim të paketave promocionale. Policia nuk e ka bërë publike emrin e kompanisë call center të përfshirë në këtë vjedhje, ndërsa mësohet se po vijojnë hetimet për të zbuluar edhe persona të tjerë, që mund të jenë të përfshirë.