Rikonstruksioni i sallës së koncerteve, TAP jep 150 mijë euro për projektin
Nuk ishte zgjedhur pa qëllim që marrëveshja të nënshkruhej në sallën e koncerteve, në Universitetin e Arteve, madje në skenë. Kur jashtë termometri shënonte afër 40 gradë celsius, brenda sallës temperaturat nuk ishin më të kursyera. Në mungesë të ajrit të kondicionuar, erashkat nuk bënin punë. Krahas emocionit të ndodhur në krahun e kundër me spektatorin, zyrtarëve nuk u rrinte kollarja në atë të nxehtë. Tashmë, kushtet e rënda, për të cilat thjesht kishin dëgjuar, po i përjetonin edhe vetë, qoftë edhe për pak.
Do të duhet të kalonin plot 80 vjet, që në godinën e projektuar nga Gherardo Bosio në fillim të viteve ’ 30 dhe e shndërruar në vitin 1966 në Institutin e Lartë të Arteve, të ndërmerrej një hap serioz për rikonstruksionin e saj. Gazsjellësi Trans AdriatikTAP do të financojë me 150 mijë euro realizimin e studimit të fizibilitetit dhe projektimit të detajuar për restaurimin, rikonstruksionin dhe rinovimin e sallës së koncerteve në Universitetin e Arteve të Tiranës ( UAT).
Pas këmbënguljes së Ministrisë së Kulturës, që fondi i investimeve me karakter sociale dhe mjedisor të TAP, të kalonin për realizimin e studimit dhe hartimin e projektit për restaurimin e sallës së koncerteve, dje, në mjediset e nxehta të kësaj të fundit, u nënshkrua marrëveshjakuadër midis Ministrisë së Infrastrukturës dhe Energjisë, Ministrisë së Kulturës, TAP, Universitetit të Arteve dhe Agjencisë Italiane të Bashkëpunimit për Zhvillim.
“Prej themelimit të Institutit të Arteve, në vitin 1966, kjo sallë nuk ka parë prekje serioze, restauruese, duke iu lënë mëshirës së kohës. Duke parë kushtet aktuale, në të cilat ajo ndodhet, nevojën imediate për ndërhyrje, por mbi të gjitha rëndësinë që kjo sallë ka, jo vetëm për jetën e Universitetit të Arteve, por atë artistike në përgjithësi, këmbëngula fort që hartimi i projektit për restaurimin e Sallës së Koncerteve të ishte prioritare dhe falënderoj TAP, që iu përgjigj kërkesës sonë për bashkëpunim dhe fondet e investimit me karakter social dhe mjedisor, ia dedikoi kësaj nisme”, u shpreh ministrja e Kulturës, Elva Margariti, sipas së cilës ndërhyrja në ndërtesën e UA përbën një përgjegjësi dyfishe, duke qenë monument kulture, por edhe një vend me rëndësi për jetën artistike të vendit.
Në emër të Ministrisë së Infrastrukturës dhe Energjisë, firmosi zv. ministri Ilir Bejtja, sipas të cilit, “Ka qenë një insistim i vazhdueshëm i ministres së Infrastrukturës dhe Energjisë, Belinda Balluku, që sponsorizime nga ky sektor të mos shpërndahen thjesht dhe vetëm për ata që quhen grupe vunerabël, por edhe për mbështetur artin, kulturën, arsimin dhe ishte me të vërtetë një gjetje e spikatur ndërhyrja në kuadrin e Paktit për Universitetin në përmirësimin e një objekti universitar, përfaqësues të kulturës në Shqipëri, të kësaj skene, e cila ka nxjerrë mjaft talente, ka mirëpritur evenimente dhe suksese të artit shqiptar dhe kulturës shqiptare”.
Malfor Nuri, menaxheri i TAP për Shqipërinë, u shpreh se nuk ishte hera e parë që TAP financon në drejtim të artit, duke përmendur Muzeun e Fotografisë “Gjon Mili”, në Korçë. “Salla e koncerteve në Universitetin e Arteve ka një dimension më të madh sesa përdorimi nga universiteti. Përveç studentëve të universitetit, këto ambiente përdoren edhe nga qytetarët e Tiranës dhe më gjerë. Këtu organizohen aktivitete të rëndësishme kulturore, të nivelit kombëtar dhe ndërkombëtar”. Mësohet se Investimet Sociale dhe Mjedisore të TAP në Shqipëri kapin vlerën 14 milionë euro.
Nino Merola, Drejtor i Zyrës Rajonale të Tiranës të Agjencisë Italiane të Bashkëpunimit për Zhvillim, shprehu mbështetjen në ecurinë e këtij projekti dhe nënvizoi rëndësinë e bashkëpunimit mes dy vendeve. Sipas tij, studimi do të kryhet nga Universiteti i Firences, me një përvojë të gjatë në restaurimin e veprave historike.
Ashtu si do shprehej edhe ministrja Margariti, të gjithë ishin në një mendje, që marrëveshja të mos mbetej thjesht në letër, por të përkthehej në ndërhyrje konkrete.