Dialogu Kosovë- Serbi, në duart e kandidatit kundër pavarësisë

Vuçiç e quan njeri në anën e Serbisë! Pacolli: BE na mbështet!

Dialogu mes Kosovës dhe Serbisë, kur të rinisë, do të ketë një drejtues të ri, që pritet të jetë spanjolli Josep Borrell, i cili u emërua si përfaqësues i BEsë për Politikë të Jashtme dhe Siguri.

Borrell vjen nga Spanja, një nga vendet e BE- së kundër pavarësisë së Kosovës. Ndërsa lajmi është quajtur jo i mirë për Kosovën, Presidenti i Serbisë, Aleksandar Vuçiç, ka nxituar ta quajë atë si një person në anën e Serbisë. “Emërimi i spanjollit Josep Borrell si përfaqësues i lartë i BE- së për Politikë të Jashtme dhe Siguri është një lajm i mirë për ne, por situata mbetet e vështirë. Nuk zgjidhet me faktin që kemi një ose dy njerëz në anën tonë”, tha Vuçiç për gazetarët në Beograd. Borrell, 72 vjeç, aktualisht ministër i Jashtëm i Spanjës, pritet të rikthehet në krye të politikës së jashtme të BE- së, pasi ka shërbyer si President i Parlamentit Europian nga viti 2004 deri më 2007. Në mars të këtij viti, Borrell ka qëndruar në Beograd, ku ka thënë se vendi i tij “nuk do ta ndryshojë politikën ndaj Serbisë, kur bëhet fjalë për Kosovën”. Ai ka shtuar se, “Në të njëjtën kohë, konsiderojmë se zgjidhja e përhershme e kompromisit për këtë çështje mund të arrihet vetëm përmes dialogut”. Por Borrell është shprehur edhe kundër shkëmbimit të territoreve midis Kosovës dhe Serbisë në vija etnike. Sipas agjencisë spanjolle të lajmeve, EFE, Borrell u ka thënë gazetarëve se “BE nuk është ndërtuar për të krijuar njësi monolite dhe homogjene mbi çështjet e kulturës dhe etnisë, por për t’ju ardhur në ndihmë njerëzve të ndryshëm që të jetojnë së bashku”. Borrell, nëse konfirmohet, do të pasojë Federica Mogherini- n. Pra, do të udhëheqë dialogun për normalizimin e marrëdhënieve midis Kosovës dhe Serbisë, i nisur që në vitin 2011 me ndërmjetësimin e BE- së. Aktualisht, bisedimet janë ndërprerë për shkak të taksës që Kosova u ka vënë prodhimeve të importuara nga Serbia. James Ker- Lindsay, profesor në Shkollën e Ekonomisë në Londër, tha se emërimi i Borrell mund të ngrejë çështje në Ballkan, pasi ai vjen nga një vend që nuk e njeh Kosovën. Por, sipas tij, Borrell mund të jetë pikërisht personi për gjetjen historike të një zgjidhjeje midis Kosovës dhe Serbisë. “Borrell ka besueshmëri në Serbi. Pozicioni i Spanjës kundër pavarësisë së Kosovës do të thotë se do të jetë më simpatik ndaj Beogradit sesa shumë figura të tjera europiane. Nëse kjo shfrytëzohet mirë, ai do të jetë në përparësi”, tha Lindsay, duke shtuar se edhe Kosova e di se nuk mund të lejojë që të armiqësohet me të. Ministri i Jashtëm i Kosovës, Behgjet Pacolli, tha se nuk ka ndonjë rëndësi se çfarë origjine do të ketë shefi i ri i diplomacisë europiane. “Kosova mirëpret udhëheqjen e re të BE. Ne besojmë se nuk varet nga origjina kombëtare roli që dikush do të luajë në Bashkimin Europian dhe politika e jashtme e Bashkimit Europian varet nga shtetet anëtare, nga të cilat shumica e kanë njohur Kosovën”, theksoi Pacolli.