Brazili i bëhet makth, shuhet ëndrra e Mesit

Arbitri u jep një dorë vendasve, Leo nuk fiton dot me ta

Brazili i bëhet makth Lionel Mesit. Në 5 ndeshje zyrtare nuk ka fituar asnjë. Superklasikja e Amerikës së Jugut nuk zhgënjeu.

Rezultoi një betejë e vërtetë, me intensitet, gola, raste dhe spektakël. Nga dueli Brazil- Argjentinë triumfuan vendasit 2- 0 dhe pas 12 vitesh siguruan kualifikimin për në finalen e Kupës së Amerikës. "Seleçao" ia doli falë golave të Gabriel Zhezusit dhe Firminos, të cilët largojnë edhe fantazmat që ishin prezente në "Mineirao" që pas humbjes 7- 1 kundër Gjermanisë. Verdhejeshilët konfirmohen makth i Argjentinës në këtë kompeticion, duke e nxjerrë 3 herë radhazi nga gara, pas finaleve të fituara në vitet 2004 dhe 2007. Argjentina dhe Leo Mesi largohen të zhgënjyer dhe kokulur, pavarësisht faktit se bënë ndeshje mjaft të mirë dhe goditën dy herë shtyllën. Kjo ishte humbja e parë në gjysmëfinale pas 5 suksesesh radhazi dhe për të gjetur herën e fundit duhet të rikthehemi në vitin 1987 kundër Uruguait. Në këtë mënyrë shuhet një tjetër shpresë e Leo Mesit për të fituar një trofe me kombëtaren e tij.

VRULL I BRAZILIT

Misteret e formacionit ishin thjesht fantazi të medias, sepse Tite dhe Skaloni zbresin më të mirët në fushë. Brazilianët e nisin më mirë, duke respektuar statusin e favoritit. Vendosmëri, përqendrimin, presing i lartë dhe shpejtësi në qarkullimin e topit. Elemente këto që vendosnin në vështirësi Argjentinën, e cila mbrohej me forca të shumta dhe kërkonte kundërsulmin. Akunja dhe De Pol jepnin ndihmën për mbrojtësit e krahëve, por ekuilibrat i prish Dani Alvesh. 36- vjeçari dhuron spektakël duke i dribluar të gjithë dhe duke e shndërruar fushën si një cirk. Pasimi për Firminon, i cili shërben Gabriel Zhezusin dhe ky i fundit nuk fal. Prishi "agjërimin" pas 2 vitesh pa gol në ndeshje zyrtare. Argjentina nuk ishte shumë e rregullt dhe e saktë, por gjithsesi ia del të përhapë panik në minutën e 29- të kur Aguero godet traversën pas një devijimi me kokë.

REAGIM DHE BEFASI

Është një tjetër panoramë në 45 minutat e dyta kur Argjentina vendosi të rriste ritmin falë punës së palodhur të De Polit dhe sakrificës së Lautaros dhe Agueros. Pa harruar Leo Mesin, i cili ndezi motorët. Prania e tij mes linjave tërboi Brazilin dhe vetë "Pleshti" iu afrua golit pas një goditjeje nga e majta. Sërish shtylla i erdhi në ndihmë Alisonit. Pak minuta më vonë ishte portieri që ndali një goditje dënimi të Mesit. Në momentin më të mirë të "Selesion" erdhi befasia dhe kundërsulmi "vrasës" me Gabriel Zhezusin. Ky i fundit përshkroi gjithë fushën dhe pasoi për Firminon, i cili firmosi rezultatin 2- 0. Pjesa e mbetur e ndeshjes ishte menaxhim i rezultatit. Ëndrrat e Mesit duhet të presin.