Pas tri ditëve KQZ vendos 812 mijë pjesëmarrës për votimet e 30 qershorit, PD nis protestat: Procesi nul!
Shifra, 45.276 vota të pavlefshme për kryetarët e bashkive
Komisioni Qendror i Zgjedhjeve dha dje shifrën finale për pjesëmarrjen në zgjedhjet e 30 qershorit. Nëpërmjet një deklarate për mediat nga zëdhënësja e KQZ- së, Drilona Hoxhaj, institucioni deklaroi se në procesin zgjedhor të 30 qershorit, kanë marrë pjesë 812249 votues ose 22.97% e totalit të votuesve.
“Sipas të dhënave paraprake të raportuara nga KZAZ- të në sistemin elektronik të të dhënave të KQZ- së, rezulton se kanë marrë pjesë në votime 812.249 zgjedhës, ose 22.97 % e numrit të përgjithshëm të zgjedhësve prej 3.536.016”, theksoi zëdhënësja e KQZ, duke dhënë në këtë mënyrë edhe shifrën finale të pjesëmarrësve në zgjedhje. Deklaratat e Komisionit Qendror të Zgjedhjeve ditën e zhvillimit të votimeve ishin kontradiktore me votat që dolën në kuti. Në raportim e bërë nga KQZ ditën e diel, në orën 19: 00, kur përfundoi edhe orari zyrtar i votimit, ishin 771863 votues ose 20.6%, ndërsa në shifrën finale të pjesëmarrjes ky numër u rrit me rreth 40 mijë vota, duke shtuar në 812249 ose 22.97%. VOTAT E PAVLEFSHME
Këto zgjedhje vendore, përveçse do të mbahen mend si votime pa opozitën pjesëmarrësve, do të kujtohen edhe për rekordin e tyre historik për votat e pavlefshme. Zëdhënësja e KQZ- së dha dje shifrat finale për votat e pavlefshme në rang kombëtar, duke theksuar se: “Numri i përgjithshëm i votave të vlefshme për kryetarë bashkie është 765.825, ndërsa për këshilla bashkiakë, 760.933. Numri i përgjithshëm i votave të pavlefshme për kryetar bashkie është 45.276, ndërsa për këshillat bashkiakë është 49.986. Në këto të dhëna mungojnë numri i fletëve të votimit të dëmtuara apo të hedhura në kutinë e gabuar”, tha zëdhënësja e KQZ- së, Drilona Hoxhaj. Nga të dhënat paraprake rezulton se në Bashkinë Tiranë, janë regjistruar rreth 13 mijë vota të pavlefshme, që përbëjnë 7% të totalit. Më e lartë është përqindja në Lezhë, ku votat e pavlefshme ishin 9% ose 1.269 fletë. Ndërsa 6% e votave të hedhura në Bashkinë Shijak janë të parregullta, saktësisht 359 fletë. Në Kurbin, votat e pavlefshme llogariten 7%, në Kukës 8% dhe në Vlorë 6%. Shifra më e lartë e votave të pavlefshme llogaritet në Bashkinë Përmet, 11% e totalit, ndërsa në Gjirokastër janë numëruar 660 fletë të pavlefshme, që përbëjnë 6%. Numri i votave të pavlefshme për Bashkinë Durrës është 3029 të tilla, që përbëjnë 7.5%. Këto të dhëna flasin për shifra të larta të votave të pavlefshme në raport me numrin e pjesëmarrëse në zgjedhje. Edhe në proceset e shkuara, ka pasur një numër të konsiderueshëm fletësh të pavlefshme, por që në raport me pjesëmarrjen nuk kanë qenë kaq të larta. Konkretisht, në vitin 2016, kanë qenë 31.898 vota të pavlefshme ose 1.98% e totalit. Në zgjedhjet vendore të vitit 2015, ka pasur 38545 vota të pavlefshme për kryetarët e bashkive, ose 2.39%, ndërsa në zgjedhjet e vitit 2013 kanë qenë 24279 vota të pavlefshme ose 1.39%.