Do trafikonin një vajzë të mitur për prostitucion në Greqi, 7 në pranga
Policia e Korçës dhe e Maliqit finalizuan dje një operacion të koduar "Zereci", i ndjekur me metoda speciale të hetimit, për goditjen e veprimtarisë kriminale në fushën e narkotikëve, trafikimit të të miturve dhe armëmbajtjes pa leje. Policia tha se dje gjatë këtij operacioni u bë e mundur të parandalohet trafikimi i një vajze të mitur në drejtim të Greqisë, me qëllim shfrytëzimi për prostitucion. Ndërsa gjatë veprimeve të terren për kapjen e grupit, Policia arriti të parandalojë një rast të kultivimit të bimëve narkotike. Në përfundim të operacionit janë vënë në pranga 7 persona, ndër ta pjesëtari i një organizate kriminale me rrezikshmëri të lartë shoqërore, i dënuar më parë në Greqi, ndërsa është shpallur në kërkim një shtetas tjetër. Në cilësinë e provës materiale janë sekuestruar armë zjarri dhe të ftohta, municione luftarake, granata dore, vlera monetare ( lekë, dollarë, euro), bimë narkotike të dyshuara kanabis sativa etj.. Në njoftimin zyrtar, Policia e Shtetit tha se operacioni u realizua në vijim të punës për parandalimin, evidentimin dhe goditjen e veprimtarisë kriminale. Në kuadër të procedimit penal të nisur 2 muaj më parë, ndjekur me metoda speciale hetimi, nga shërbimet e Komisariatit të Policisë Maliq, në bashkëpunim me Prokurorinë e Korçës, Drejtorinë e Forcës së Posaçme Operacionale në Policinë e Shtetit dhe Sektorit për Rendin e Policimin në Komunitet në Policinë e Korçës, u ndaluan shtetasit: R. L., 33 vjeç, banues në Drithas, Maliq, ( i dënuar më parë në Greqi për veprat penale "Vjedhja me dhunë", "Vjedhja me armë", vepra penale këto të kryera në kuadrin e organizatës kriminale); M. F., 37 vjeç, banues në Kakaç, Maliq; E. B., 34 vjeç, banues në Petrushë, Pogradec; R. M., 29 vjeçe, banuese në Kakaç, Maliq; E. K., 26 vjeç, banues në Zerec, Maliq; O. M., 39 vjeç, banues në Zerec, Maliq; Ç. F., 36 vjeç, banues në Kakaç, Maliq ( i dënuar më parë për vjedhje) për veprën penale "Përkrahja e autorit të krimit". Gjithashtu u bë shpallja në kërkim e shtetasit me iniciale L. P., 28 vjeç, banues në Shelcan, Elbasan. Nga hetimet e kryera është provuar se shtetasit R. L., M. F., E. B., R. M. dhe L. P. kishin planifikuar të trafikonin për qëllim prostitucioni në drejtim të Greqisë një shtetase të mitur. Gjithashtu, shtetasit R. L., M. F., E. K. dhe O. M., në bashkëpunim me njëri- tjetrin, kanë kultivuar bimë narkotike në territorin e fshatit Zerec, Maliq, të cilat u asgjësuan gjatë operacionit dhe një pjesë u sekuestrua në cilësinë e provës materiale.