PD nxjerr dokumentet për falsifikimin e 30 qershorit, KQZ “zbulon” fajtorin: Në disa vende s’kap telefoni
Hasa: Për të mbuluar skandalin e Elbasanit, në orën 12: 14 prodhoi dokumente false, posaçërisht për Ballën
Partia Demokratike akuzoi dje Komisionin Qendror të Zgjedhjeve se ka falsifikuar procesverbalin e zgjedhjeve për Bashkinë e Elbasanit. Nëpërmjet një deklarate për mediat, ish- deputeti i PD- së, Endri Hasa, theksoi se KQZ ka publikuar dy procesverbale për Bashkinë e Elbasanit, ku i pari tregonte se kryetari i bashkisë kishte marrë 2861 vota më shumë sesa votues, ndërsa tek i dyti është bërë ndryshimi, duke e nxjerrë rezultatin të saktë.
“Sa më shumë Partia Demokratike, mediat dhe shoqëria civile zbulojnë skandalet nga manipulimi që iu bë pjesëmarrjes së votuesve në 30 qershor, aq më shumë falsifikime detyrohet të bëjë Komisioni Qendror i Vjedhjeve. Sot ( dje), duke tentuar të mbulojë se në kuti ka më shumë vota se votues, KQZ- ja ka prodhuar dokumente false në shërbim të pushtetit të Edi Ramës. Rezultati i Bashkisë së Elbasanit është simboli i manipulimit dhe falsifikimit të 30 qershorit. Qytetarët janë njohur sot me faktin skandaloz se kandidati i Partisë Socialiste në Elbasan ka më shumë vota sesa numri i fletëve në kutitë e votimit. Nuk janë 100 apo 200 vota. Janë 2861 vota për Edi Ramën më shumë në Elbasan sesa fletë votimi të gjendura në kuti. Kjo është matematika e Kryeministrit në ikje që nuk di çfarë janë zgjedhjet e lira e të ndershme, që manipulon votat edhe kur është i vetëm në votime. Këtë matematikë prej hajduti nuk mund ta mbulojë as Edi Rama, as Komisioni Qendror i Vjedhjeve dhe as Taulant Balla. Për të kuptuar se çfarë është në gjendje të bëjë banda e Edi Ramës për të mbuluar skandalin e mbushjes së kutive dhe të procesverbaleve, po demonstroj disa të dhëna të thjeshta, që provojnë manipulimin”, theksoi ish- deputeti i PD- së. Në vijim të deklaratës së tij, Hasa dha edhe detaje që, sipas PD- së, provojnë manipulimin duke theksuar se: “Me publikimin e skandalit të rezultatit të Elbasanit me 2861 vota më shumë për kandidatin socialist sesa janë gjendur vota në kuti, Komisioni Qendror i Vjedhjeve falsifikoi një dokument posaçërisht për Taulant Ballën dhe Partinë Socialiste, në mënyrë që banditët me kollare të Edi Ramës të bënin propagandë, duke falsifikuar të vërtetën. Dokumenti i parë që zbuloi skandalin është publikuar në faqen e KQZ- së më 5 korrik, në orën 10: 39. Linku i këtij dokumenti, të cilit iu referua media sot, gjendet akoma në faqen e internetit të KQZ- së. Pas publikimit të skandalit, Komisioni Qendror i Vjedhjeve shtoi sot një dokument të ri, të prodhuar posaçërisht për Taulant Ballën, me rezultate të ndryshuara. Ky dokument është shtuar sot në orën 12: 14, siç provohet qartë nga të dhënat që gjenden në faqen e KQZsë në internet. Pak minuta pas shtimit të këtij dokumenti të falsifikuar nga KQZ- ja, numri dy i Partisë Socialiste, Taulant Balla, e publikoi atë në “Facebook”- un e tij, duke thelluar me mashtrime të pacipa dhe të paprecedentë krimin e manipulimit të 30 Qershorit. Manipulimi është kryer në çdo qendër votimi në të gjitha bashkitë e vendit”.