Vetingu në Polici, në fund të muajit nis rivlerësimi
Drejtuesit e lartë, të parët që do përballen me Komisionin
Në fund të këtij muaji pritet të nisë procesi vetingut për drejtuesit e lartë të Policisë së Shtetit, duke filluar me Ardi Veliun.
Komisioni i Jashtëm i Vlerësimit për “Për vlerësimin kalimtar dhe periodik të punonjësve të Policisë së Shtetit, Gardës së Republikës dhe Shërbimit për Çështjet e Brendshme dhe Ankesat, në Ministrinë e Brendshme”, ka përzgjedhur 45 emrat e parë që do t’i nënshtrohen procesit të vetingut. Subjektet e vlerësimit janë në detyrat më të larta drejtuese në Policinë e Shtetit, Shërbimin për Çështjet e Brendshme dhe Ankesat dhe në Gardën e Republikës. Dosjet e vetëdeklarimit janë tërhequr në fund të muajit maj nga Komisioni i Jashtëm i Vlerësimit dhe ka nisur puna në fazën e parë, ajo e shqyrtimit të deklaratave, kërkimit të informacioneve dhe verifikimeve përkatëse. Sipas parashikimeve ligjore, pas procesit të hetimit administrativ, do të mbahet për çdo subjekt seancë e hapur dëgjimore. Konkretisht, bëhet fjalë për 31 drejtues të lartë të Policisë së Shtetit, duke filluar me drejtorin e Përgjithshëm, Ardi Veliu, për 12 oficerë të lartë të SHÇBA, duke nisur nga drejtori i Përgjithshëm, Muhamet Rrumbullaku, ndërsa dy të tjerë janë drejtuesit e Gardës së Republikës, komandanti Gramos Sako dhe zëvendësi i tij.
ZV. MINISTRI I BRENDSHEM
Zv. ministri i Brendshëm, Julian Hodaj, tha se ata që kalojnë të tri kriteret e procesit të rivlerësimit do të qëndrojnë në detyrë. Ndërsa ata që nuk kalojnë, largohen nga detyra, me përjashtim të rasteve kur vihet re te punonjësi, ndonjë mangësi profesionale, e cila mund të kompensohet shumë mirë nëpërmjet një procesi riformimi dhe rispecializimi në Akademinë e Sigurisë. “Procesi ka vijuar me fazën e parë, që janë rreth 245 punonjës të funksioneve dhe gradave më të larta. Janë kërkuar dhe shkëmbyer informacione më të gjitha institucionet. Kini parasysh që bëhet fjalë për një volum të lartë informacioni. Do ishim shumë të lumtur nëse në fund të korrikut do të kishim edhe caktimin e seancave të para dëgjimore. Ligji parashikon edhe mundësinë e ish- punonjësve që mund të aplikojnë dhe t’i nënshtrohen rivlerësimit dhe për t’u rifutur në Policinë e Shtetit dhe tjetra është Akademia e Sigurisë nëpërmjet rekrutimeve të reja”, u shpreh Hodaj.